ҚТЖ-да төтенше жағдайдың алдын алу бойынша жаттығу өтті

ҚТЖ-да қауіпті жүктің ағуына байланысты төтенше жағдайдың теріс салдарын жою бойынша оқу-жаттығулар өткізілді. Іс-қимылдарды пысықтау мақсатында «ҚТЖ-Жүк та сымалы» ЖШС-ның барлық филиалдарында техникалық сабақтар ұйымдастырылды.

Жоспардан тыс техникалық сабақтарға станциялардың, локомотив пайдалану мен вагон деполарының 19,5 мыңнан астам қызметкері қатысты. Іс-шаралар ҚТЖ мен ҚР ТЖМ іс-қимылдарының, күштері мен құралдарының тиімділігі мен үйлесімділігін арттыруға бағытталған. 1,1 мыңнан астам пойыз құрастырушылар практикалық сабақта қауіпті жүктер тиелген вагондармен маневрлік жұмыс жүргізу кезінде сақтық шараларын зерделеді.

Қостанай, Семей, Ақтөбе, Қарағанды, Шымкент және Қызылорда жол бөлімшелерінде ТЖМ аумақтық бөлімшелерімен бірлесіп тасымалдау кезінде қауіпті жүктердің ағып кетуіне байланысты ТЖ жағдайында барлық шұғыл қызметтердің өзара іс-қимыл алгоритмі пысықталды. Бүкіл филиалдарда қауіпті жүктердің ағып кетуін жою кезінде жұмыскерлердің бар-жоғына және арнайы киіммен, аяқ киіммен қамтамасыз етілуіне тексеру жүргізілді.  

Астанадағы Өндіріс тұрғын алабы тұсындағы теміржол бойында да кезекті тактикалық оқу-жаттығу ұйымдастырылды. «Теміржол көлігімен қауіпті жүктерді тасымалдауда апатты жағдай туындаған кезде төтенше жағдай салдарын жою» деп аталған іс-шараға азаматтық қорғаныс қызметінің өкілдерімен қатар теміржолшылар да қатысты. Теміржол бойында тұрған вагондар мен цистерналардан уытты сұйықтықтар тамып, қауіп төндіруі мүмкін. Сценарий бойынша әскери күзет қызметкерлері мен желілік тәртіп сақшылары аумақты қоршап, басқа адамдардың өтпеуін қадағалады. Одан әрі өртке қарсы қызмет пен СЭС мамандары Төтенше жағдай аумағын тексеруге келді. Сол жерде электр энергиясы өшіріліп, аумаққа алғашқы көмек көрсету қызметі кірді. Сосын қауіпті жою жұмыстары жүргізіліп, құтқару топтары инертті материалдар төгілген жерлерді залалсыздандырды.