2024 жылдан бастап еліміздің барлық теміржол вокзалында жөндеу жұмыстары жүргізіледі
Қазақстанның барлық теміржол вокзалында жөндеу жұмыстарын 2024 жылдан бастап 2 кезеңге бөліп жүргізу жоспарланып отыр. Бұл туралы ҚР Көлік министрі Марат Қарабаев уәкілетті және мүдделі ұйымдармен өткен кеңесте айтты, деп хабарлады министрліктің баспасөз қызметі.
«Өңірлерге жасаған жұмыс сапарларымның барысында теміржол вокзалдарының жай-күйіне ерекше назар аударған болатынмын. Елімізде жалпы саны 59 вокзал бар. Олардың басым бөлігі «Қазақстан темір жолының» балансында, ал Алматы-1, Алматы-2, Павлодар, Екібастұз, Ақсу, Түркістан және Шымкент вокзалдары әкімдіктердің қарамағында. Бүгінгі таңда теміржол бекеттері ғимараттарының жай-күйі әртүрлі екенін көріп отырмыз», – деді Марат Қарабаев.
Оның айтуынша, 50 вокзалда санитарлық тораптарды, шатырды, баспалдақ алаңдарын, инженерлік жүйелерді, сондай-ақ жолаушылар платформаларын, жарықтандыру жүйелерін, ақпараттық табло-кестелерін, ана мен бала және мүмкіндігі шектеулі жандарға арналған бөлмелерге арналған жиһаздарды орнату әрі ауыстыру талап етіледі.
«Күрделі жөндеу жұмыстарын екі кезеңге бөлу ұсынылып отыр. Атап айтқанда, 2024-2025 және 2026-2027 жылдар аралығында. Сонымен қатар біз қажетті кешенді жөндеу жұмыстарын жүргізуді де қарастырамыз. Ол үшін жобалық-сметалық құжаттама әзірлеп, оларды жеделдетілген қарқынмен бекіту керек. Бұдан басқа, жергілікті атқарушы органдарды тұрақ аймақтарын қоса алғанда, вокзал маңы аумақтарын «ҚТЖ» ҰК» АҚ балансына беру туралы мәселені қарауды сұраймын», – деді министр.