Алматы бөлімшесінде үздік тауар кассирлері анықталды
Алматы жүк тасымалдау бөлімінде «Үздік тауар кассирі» атағына конкурс өтті, деп хабарлайды Rail-news.kz.
Конкурс мақсаты – жүк тасымалы саласында темір жол клиенттерімен жұмыс істейтін мамандардың кәсіби шеберлігін арттыру. Тауар кассирлері төлемдердің уақытылы есептелуін қамтамасыз етіп, жүктерді қабылдау, тиеу және беру, сондай-ақ оларды қайта жіберу жөніндегі құжаттарды тексеріп, ресімдейді.
Үздік кәсіпқой атағы үшін Достық, Алтынкөл, Алматы, Талдықорған, Текелі, Қарабұлақ, Үштөбе, Ақтоғай, Бескөл, Матай, Қапшағай, Іле, Жетіген, Малай-Сары, Сарыөзек, Тентек, Байсерке, Шелек, Бұрундай, Отар, Жетісу, Медеу, Шамалған, Ақсенгір және Қайрат станцияларының тауар кассирлері бақ сынасты. Байқауда үздіктердің үздіктері жеңіске жетті.
Үздік маман ретінде Достық станциясының тауарлық кеңсе бастығы Салтанат Жәкенова танылды. Бұл қызметте ол 20 жылдан астам жұмыс істейді, «Үздік маман» атағына да ие. Үздіктер арасында Алтынкөл станциясының аға тауар кассирі Арай Төлегенова да бар, мамандығы бойынша жұмыс өтілі – 17 жыл. Талдықорған станциясының аға тауар кассирі Лариса Бондаренко бай өмірлік тәжірибе мен нормативтік базаны жақсы білетіндігін көрсетті. 33 жылдан астам жұмыс тәжірибесі мен кәсібилігі оның мамандығы бойынша үздіктер қатарында болуына алып келді. Осы мамандық бойынша 17 жыл жұмыс істеген Іле станциясының тауар кассирі Айжан Сапарғалиева кәсіби білімін, дағдыларын, креативтілігі мен ойлау логикасын көрсетті.