Жолаушылардың мазасын алған мас әйел пойыздан түсірілді
Жамбыл облысы көліктегі полиция департаменті мас жолаушы пойыздан түсірілгенін мәлімдеді, деп хабарлайды Rail-news.kz.
Астана – Шымкент бағытындағы жолаушылар пойызы Шу станциясына келгеннен кейін желілік полиция бөлімінің қызметкерлері масаң жолаушыны акт бойынша пойыздан түсірді.
«Тексеру барысында көлік полицейлері Түркістан облысының 34 жастағы тұрғынын анықтады. Ол қоғамдық орында масаң күйде болған және түнгі уақытта жолаушылардың тыныштығын бұзған», – деді көліктегі полиция департаменті бастығының бірінші орынбасары Мадияр Айтуғанов.
Құқық бұзушыға ҚР ӘҚБтК-нің 440-бабының 1-бөлігі (Алкогольдік ішімдіктерді ішу немесе қоғамдық орындарға масаң күйінде келу), 437-бабының 2-бөлігі (Тыныштықты бұзу) бойынша бірден екі әкімшілік хаттама толтырылып, оған 15 АЕК (51 750 тг) мөлшерінде айыппұл салынды.
«Айта кету керек, аталған азаматша бұған дейін тыныштықты бұзғаны үшін әкімшілік жауапкершілікке тартылған болатын», – деді полиция полковнигі.