ҚТЖ мен Ресей темір жолдары ынтымақтастық мәселелерін талқылады
Шымкент қаласында «ҚТЖ» ҰК» АҚ және «РЖД» ААҚ стратегиялық ынтымақтастық жөніндегі бірлескен жұмыс тобының XIII отырысы өтті.
Тараптар делегацияларын: «ҚТЖ» ҰК» АҚ-дан – Басқарма төрағасының орынбасары Қанат Әлмағамбетов, «РЖД» ААҚ-дан – Бас директордың бірінші орынбасары Сергей Павлов басқарды.
Кездесуде қосымша жүк ағындарын тарту, жүктерді қағазсыз технология бойынша тасымалдау, тікелей халықаралық теміржол-су қатынасын дамыту, локомотивтер мен локомотив бригадаларына паритеттік қызмет көрсету және т.б. мәселелер қаралды.
2023 жылға арналған ҚТЖ мен Ресей темір жолдары арасындағы стратегиялық ынтымақтастықтың негізгі бағыттарын іске асыру жөніндегі іс-шаралар жоспары орындалғаны атап өтілді. Сондай-ақ, Қағазсыз технология бойынша жүктерді және вагондарды тасымалдауға көшуді жандандыру бойынша жол картасының ұйымдастырушылық, техникалық және технологиялық іс-шаралары іске асырылды. ҚТЖ бастамасы бойынша Қызыл Ту – Граничная – Русская Поляна теміржол учаскесін қалпына келтіру және Бақты-Аягөз теміржол желісін салу мәселесі талқыланды.
Отырыс қорытындысы бойынша стратегиялық ынтымақтастық бойынша, атап айтқанда, 2024-2030 жылдарға арналған тасымалдау көлемінің болжамын қалыптастыру бойынша, оның ішінде «Солтүстік – Оңтүстік» халықаралық көлік дәлізінің шығыс бағыты және мемлекетаралық түйісу пункттерінің жұмысын жетілдіру бойынша басым бағыттар мен іс-шаралар айқындалды.
Қазақстан мен Ресейдің т / ж әкімшіліктері халықаралық жүк теміржол қатынасында қағазсыз технология бойынша тасымалдау көлемін ұлғайту жөніндегі жұмысты жалғастырады.
Тараптар жаңа технологиялар мен жол машиналарын қолдана отырып, технологиялық процестерді цифрландыру бойынша жолды күрделі және ағымдағы жөндеу кезінде технологиялық «толаскездерді» ұйымдастыру мен жүргізуде тәжірибе алмасуға уағдаласты.
Стратегиялық ынтымақтастық жөніндегі жұмыс тобының келесі отырысы 2024 жылы Ресей Федерациясында өтеді.