100 жас есім: Модульдік оқу жалғасуда
«Қазақстан теміржолшысы» газетінің тілшісі
«ҚТЖ» ҰК» АҚ-ның «100 жас есімі» бағдарламасы аясында қарашаның 20-сы мен 23-ші аралығында оқытудың 3 модулі онлайн форматта өтті. Оның ашылуына қатысқан компанияның бас инженері Батыр Котырев аталған бағдарламаның артықшылықтарын айтып, қатысушыларға сәттілік тіледі.
Бағдарлама аясында жас мамандар арнайы шақырылған спикерлерден дәріс тыңдап, түрлі тақырыпта өткен вебинарларға қатысты. 4 күнге созылған модульдік білім алу қорытындысында емтихан тапсырып, алған білімдерін қорытындылады.
– Оқыту кезінде Zoom платформасы арқылы «Қаржылық сауаттылық», «Уақытты басқару» және «Тәртіп әдебі» тақырыптарында вебинарлар өткізілді. Оқытудың 3-ші модулінде кәсібилігімізді тағы мәрте шыңдадық, жаңа білім игеріп, дағдыларды дамыттық. Мысалы, «Қаржылық сауаттылық» тақырыбындағы вебинарды спикер Әсел Ауылбекова өткізді. Бұл семинардан бюджетті басқарудың тиімділігін, қаржылық пирамидалардың, несиелердің түрлерін, бағалы қағаздар нарығының құралдарын танып білдік. Осындай оқыту бағдарламасын жүзеге асыратын Әлеуметтік саясат департаменті, оқытуды ұйымдастырушылар командасына және спикерлерге алғыс білдіремін, – дейді «Жолаушылар тасымалы» АҚ «Экспресс» филиалы Алматы учаскесінің жолсерігі Диана Бимбетова.
Сонымен қатар «Уақытты басқару» вебинарын спикер Алмаз Амалбеков өткізді. Бұл семинарда қатысушылар уақытты қалай тиімді басқаруға, адамдардың психотиптерін қалай жіктеуге, Эйзенхауэр матрицасын қызметте қалай тиімді пайдалануға болатынын анықтап білді. Оқытудың соңғы күні «Тәртіп әдебі» тақырыбында спикер Латина Сатарованың вебинарында нағыз кәсіпқойдың этикалық қасиеттері, мүдделер қақтығысы, сыбайлас жемқорлыққа қарсы күрес, әріптестер арасындағы ішкі коммуникациялар сынды тақырыптар қозғалды.