Астанадан жеткен фотоальбом

Ақтөбедегі теміржол мұражайына Астанадан жаңа фотоальбом келді. Өткен жылы аталып өткен «ҚАЗКӨЛІККӘСІП» ҚБ-нің 30 жылдығына орай  жарық көрген «Біздің күшіміз бірлікте» атты жинақта салалық кәсіподақтың жүз жылдық тарихы көрініс тапқан.    

Көлемді фотоальбомда теміржолда алғашқы кәсіподақ ұйымдарының пайда болуынан бастап, оның құрылып-қалыптасып, нығаю жолдары, теміржолшылар өміріндегі маңызы мен ролі, жетістігі жайлы көптеген мәліметтер бар. Қазақ жеріне келген алғашқы теміржол желілері, ескі вокзалдар мен Орынбордағы басты теміржол шеберханасының ХХ ғасырдағы көрінісін де осы фотоальбомнан табасыз. Сонымен қатар паровоз машинистері, олардың көмекшілері мен отжағушылар, темір ұсталары, балға соғушылар, слесарлар, кондукторлық құрам, бағыттамашылар, пойыз құрастырушылар, жолшылар мен өткел күзетшілері, жол және көпір шеберлері, инженерлік-техникалық персонал туралы қызықты деректерді кездестіруге болады. «1906 жылы теміржолшылардың орташа жалақысы айына 37,9 рубльге жетті. Ол кезде сиыр еті 40 тиын болған...» деген мәліметтер келтірілген. ХХ ғасырдағы теміржолшылардың формасы да назар аударарлық.    

«Бір ғасыр бұрын да теміржол саласында кәсіподақ ұйымдары белсенді жұмыс істегенін көруге болады. Кәсіподақтардың талап етуімен теміржолдағы ауыр еңбек жағдайына өзгерістер енгізіліп, теміржолшылар түрлі жеңілдіктерге ие болған», – деді мұражай қызметкері Анар Жұбаева.  

«КАЗКӨЛІККӘСІП» ҚБ-нің құрылуымен сала кәсіподағы қанатын кеңге жайып, бұрынғыдан да қуатты күшке айналды. Көлік саласында кәсіподақтың нығаюы мен дамуы туралы мәліметтер жинақта түрлі құжаттар және фотосуреттермен берілген. Әр өңірдегі жұмыстарды ұйымдастырған кәсіподақтың алғашқы басшылары, кәсіподақ ұйымдарымен қолға алынған жұмыстар, қол жеткен жетістіктер кезең-кезеңімен көрініс тапқан.    

Мұражай қызметкері кәсіподақ өмірінің жылнамасы сынды фотоальбомның көпшілік үшін қызықты да құнды дүниеге айналарына сенімді.