ҚТЖ және РЖД ынтымақтастық мәселелері бойынша екіжақты келіссөздер жүргізді
Мәскеу қаласында «ҚТЖ» ҰК» АҚ және «РЖД» ААҚ басқарма мүшелерінің кездесуі өтті.
Тараптар 2023 жылы бірлескен жұмыстың қорытындысын шығарып, теміржол көлігі және логистика саласындағы ынтымақтастықты нығайтуды, тасымалдау көлемін ұлғайту перспективаларын, мемлекетаралық түйісу пункттері жұмысының тиімділігін арттыру мәселелерін талқылады.
Кездесудің негізгі тақырыбы Ресей мен Қазақстан аумағы арқылы өтетін көлік дәліздерін дамытудың негізгі бағыттары, 2030 жылға дейін Солтүстік-Оңтүстік халықаралық көлік дәлізінің шығыс бағыты бойынша тасымалдау көлемін келісу болды.
Тараптар Қазақстаннан Ресейге және кері қарай электрондық жүкқұжаттары бойынша тасымалдар көлемін ұлғайтуға, түйіспелер бойынша пойыздар алмасу (беру) жөніндегі жұмысты, локомотив тартымын пайдалануды және жүк тасымалы саласындағы цифрлық өзара іс-қимылды жақсартуға уағдаласты.
2023 жылдың 11 айында Қазақстан мен Ресей арасындағы жүк тасымалының көлемі 5,4% ұлғайып, 83,8 млн тоннадан асты.