Астана жол дистанциясы жолды қардан тазартуға «Ауыр артилерияны» іске қосты (Фото)
«Қазақстан теміржолшысы» газетінің тілшісі
Қыс басталса қарбалас тірлігі артатын жолшылар үшін биылғы қатал маусымның басты жұмысы қар тазалау болып тұр.
Арқаның қысының әуселесін әуелден білетін астаналық жолшылар табиғаттың тосын сыйына қашан да дайын. Астана жол дистанциясына қарайтын 731,5 км теміржол телімінде бүгінде қар тазалау жұмысы қарқынды жүріп жатыр. «Ауыр артилерия» да іске қосылған, яғни жолшыларға көмекке техника келген.
– Астана жол дистанциясы қар тазалауға арналған техникалардың бәрін жаз бен күзде жөндеп, жарамдылығын тексеріп, майлап, сырлап, дайындап қойған. Дәл қазіргі күндері дистанция бойынша 13 техника қармен күрес жұмыстарына жұмылдырылып отыр. Ұйытқи соққан ақпанның ақ бораны жолдарды лезде қарға көміп тастап, қозғалыс қауіпсіздігіне нұқсан келтіреді. Сондықтан, жолшылар үнемі жол бойында жүр. Жалпы биыл қыс басталғалы дистанцияға қарасты теміржол бойынан 116 200 текше метр қар шығарылды, – деп мәлімет берді дистанцияның бас инженері Төленді Шапшекеев.
Аталған техникалардың алтауы – СМ2 машиналары, олар станция бойындағы қарды жинап апарып полигонға төгеді. ПСС - комбайн сияқты қарды өзі жинап, өзі апарып төгуге арналған. Қалған алтауы – СДПМ техникасы көбіне перегондарда жолдың қарын қырып, алысқа лақтырып өтеді. Бұл техникамен қыс түскелі 2863 км жолдың қары қырылып, тазаланған екен. Бұлардан бөлек станциялардағы бағыттама бұрмалардың қарын ауамен үрлеп кетіретін 6 үрмелі компрессор бар. Оны міндетті түрде 8 адамнан 16 адам жұптасып, әр құралға екі адамнан жұмыс істеуде дейді.
