Ақтау портына гидродинамикалық модельдеу жүргізіледі
«Қазақстан теміржолшысы» газетінің тілшісі
Дүниежүзілік банктің мамандары Каспий теңізі деңгейінің төмендеуін зерттеу жұмыстарын жүргізетін команданы ұсыну мақсатында Ақтау теңіз портына келді.
Алдағы 18 ай ішінде HR Wallingford компаниясының мамандары Каспий теңізі бойынша алдыңғы зерттеулердің деректерін, өңірлік Климаттық модельдердің (RCM) нәтижелерін кезең-кезеңімен зерттеп, рельефтің цифрлық моделін және су алаптарының гидрологиялық моделін дайындайды. Сондай-ақ климаттың өзгеруінің болашақ сценарийлерін модельдеу үшін бағдарламалық қамтамасыз етуді (telemac) пайдалана отырып, бүкіл Каспий теңізі мен Ақтау портын гидродинамикалық модельдеу жүргізіледі.
Зерттеулер барысында жинақталған деректер мен ұсынымдар Ақтау портының инфрақұрылымы мен жабдықтарын қайта жаңарту мен жаңғыртудың кейінгі жобаларында пайдаланылатын болады.
Соңғы онжылдықта Каспий теңізі деңгейінің төмендеуі осы ішкі су айдынына іргелес елдердің экологиясын, экономикасын және әлеуметтік аспектілерін қозғайтын күрделі проблемаға айналды. Мамандар бұл құбылыстың ұзақ мерзімді әсеріне, соның ішінде биоәртүрліліктің жоғалуына, су мен ауа сапасының нашарлауына және экономикалық тұрақтылыққа қауіп төндіретініне алаңдаушылық білдіреді.
Дүниежүзілік банк өкілдерінің сапары – бұл Ақтау портының Каспий теңізі деңгейінің төмендеу проблемаларын зерттеу бағытындағы бастамаларын іс жүзінде жүзеге асыру. Кездесуде «АТСП» ҰК» АҚ басқарма төрағасы Абай Түрікпенбаев барлық өңірлік құрылымдардың бірлескен күш-жігері ғана өңірдің бірегей экожүйесін сақтауға және оның болашақта тұрақты дамуын қамтамасыз етуге мүмкіндік беретінін айтты.