Жамбылдық теміржолшыларға жаңа техника берілді

Күн демей, түн демей, аяз-боран, қара суыққа қарамай, аптапты да елемей жол қауіпсіздігін қамтамасыз ететін теміржолшылар енді діттеген жерге қиналмай жететін болды. Жамбыл магистральдық желі бөлімшесіне қарасты шаруашылықтарға жаңа автокөліктер берілуде.

– Жаңа автокөліктердің бәрі көп кешіктірмей беріледі. Өткен аптада түрлі қызметтерге арналған автокөліктердің алғашқы легінің кілтін тапсырдық. Арнайы мамандандырылған көліктердің артықшылықтары бар. Қыста жылы, жазда салқындатқыштары аптап ыстықты сездірмейді. Бұл қадам жұмысты сапалы, жедел атқаруға көп септігін тигізеді. Ең басты мәселе – теміржолшылардың еңбек етуі үшін барлық мүмкіндіктер қарастырылып жатыр, – дейді Жамбыл магистральдық желі бөлімшесінің директоры Сұлтан Буромбаев.

Мәліметке сүйенсек, ШЧ-34 Сарышаған, ШЧ-35 Шу, ШЧ-36 Жамбыл белгі беру және байланыс дистанцияларына 5 жүк-жолаушылар автокөлігі, теміржолшы бригадаларына арналған 3 мамандандырылған көлік, 3 мамандандырылған жедел әрекет ету автокөлігі сатып алыныпты.

Ал ЭЧ-21 Жамбыл, ЭЧ-22 Шу, ЭЧ-23 Сарышаған электрмен жабдықтау дистанцияларына 6 жүк-жолаушылар автомобилі, 6 жол талғамайтын мамандандырылған жедел әрекет ету машинасы, 3 жеті орындық бригадаларға арналған жүк көліктерінің кілті тапсырылмақшы. Сондай-ақ ВП-35 Жамбыл станциясына, ВП-36 Шу станциясына бір-бірден бригадаға арналған мамандандырылған жүк көліктері беріледі. Тағы 5 жол дистанциясына вахталық мамандандырылған автобустар сатып алынған.