Студенттер машинист-нұсқаушымен кездесті
Ақтөбе облысы бойынша меншікті тілші
Тараз теміржол көлік және коммуникация колледжінің студенттері «ТЭ33А тепловозының микропроцессорлық басқару жүйесі» тақырыбы аясында машинист-инструктор Ғ.Серікбаевпен кездесті.
Бұл іс-шараны колледж директорының өндірістік оқыту ісі жөніндегі орынбасары Ж.Тайбеков пен «Қазақстан теміржолы» ҰК» АҚ «Теміржол көлігі персоналын бағалау және дамыту орталығы» филиалы бірлесе ұйымдастырды. Кездесуде машинист-инструктор Қазақстанда шығарылатын локомотивтер жайлы әңгімелеп, тәжірибесімен бөлісті. Сондай-ақ ол «Локомотив құрастыру зауыты» АҚ-ында құрастырылатын ТЭ33А тепловоздары туралы толық мәлімет берді.
– Еліміздегі кәсіби-техникалық білім беру жүйесі ең бірінші кезекте еңбек нарығында өздері даярлайтын мамандарға деген сұранысты арттыруды бағдар ретінде ұстауы керек. Өйткені ұлттық экономиканың қозғаушы күші – көліктік логистика мен өндіріс, кәсіпкерлік саласы. Біздің колледж білікті мамандардың тәжірибесін оқу процесіне енгізу әрі теміржол саласының болашақ даму бағдары мен бүгінгі проблемаларды студенттерге таныстыру үшін жұмыс берушілермен өзара әрекеттесу туралы келісім жасасқан. Оқу орнының әлеуметтік серіктестерінің бірі – «ҚТЖ» ҰК» АҚ «Теміржол көлігі персоналын бағалау және дамыту орталығы» филиалы, – дейді Ж.Тайбеков.