Өнеркәсіптік электровоз күрделі жөндеуден өтті
«Қазақстан теміржолшысы» газетінің тілшісі
Атбасар электровоз жөндеу зауытында EL-21 №008 өнеркәсіптік электровозына күрделі жөндеу және жаңғырту жұмыстары сәтті аяқталды.
Жұмыс 2023 жылдың мамыр айында Атбасар электровоз жөндеу өндірістік базасында басталып, осы бағытта қызметті атқару үшін зауыттың 50 жұмыскері атсалысты. EL-21 электровозын күрделі жөндеу және жаңғырту аясында электр жабдықтарының 70%-дан астамы заманауи балама бөлшектермен алмастырылды. Олар – іске қосу-тежегіш резисторлар, амортизаторлар, контакторлар тобы, орталық пантографтар және ажыратқыштар. Сондай-ақ жаңа статикалық түрлендіргіш орнатылып, электровоздың қуат көзі мен аккумуляторды зарядтау схемалары жаңартылды, жаңа компрессорлар және басқа да автотежегіш қондырғылар орнатылды.
Сым құбырын төсеу үшін құрастыру үстелі жасалды. Локомотив бригадасының жұмыс жағдайын жақсарту үшін кондиционер орнатылып, жарықтандыру толығымен жарықдиодқа ауыстырылды және КПД-ЗПВ электронды кешені орнатылды. Биыл EL-21 электровоздарын күрделі жөндеу жұмыстары жалғасатын болады.