Темір жол құрылысының қарқынын арттырамыз – президент

Атырауда өтіп жатқан Ұлттық құрылтайда мемлекет басшысы еліміздің аумағы арқылы өтетін көлік дәліздерін дамыту барысы жайлы айтты.

Қасым-Жомарт Тоқаев өз сөзінде сыртқы сауда айналымының ұлғайуына барынша жағдай жасау қажеттігіне тоқталды. 

«Ол үшін логистика орталықтары мен қоймалар салып, темір жол құрылысының қарқынын арттырамыз. Сондай-ақ теңіз тасымалының инфрақұрылымын жақсартып,  өзгертуге ыңғайлы тариф саясатын жүргіземіз. Мұның бәрі еліміздің тұрған жерін барынша тиімді пайдалануға мүмкіндік береді. Экономиканың көптеген саласын дамытуға септігін тигізеді», - деді президент.

Мемлекет басшысы сондай-ақ елімізде осы жылдың соңына дейін суперкомпьютер жасалып, жаңа дата-орталықты іске қосу жоспарланып отырғанын жеткізді. 

«Біз Каспий теңізінің түбі арқылы талшықты-оптикалық байланыс желісін салуды көздеп отырмыз. Бұл жоба Еуропа мен Азия арасында тағы бір цифрлы дәліз орнатуға жол ашады. Мен жақында «Қазақстан темір жолы» компаниясының Инновация орталығында болдым. Орталық қызметінің арқасында еңбек өнімділігін арттыруға, шығындарды азайтуға мүмкіндік бететін озық технология осы салаға енгізіліп жатыр. Бұл жұмысқа еліміздің және шетелдің білікті IT-мамандары жұмылдырылды», - деді ол. 

Темір жолдың өткізу қабілетінің артуы,жанар-жағар майдың үнемделуі және компания табысының көбеюі – цифрландыру ісінің нақты әрі көзге көрінетін нәтижесі. Цифрлы экожүйені осылай қалыптастыру керек. Үкімет осы жұмыстың ауқымын кеңейтіп, оны экономиканың барлық саласына енгізуге тиіс.