Ұлыстың ұлы күні ұлықталады
«Қазақстан теміржолшысы» газетінің тілшісі
Мемлекет басшысының тапсырмасына орай, күллі шығыс халықтарының жыл санауы бойынша күн мен түн теңеліп, тіршілік оянатын жыл басы Наурыз мейрамы биыл республикалық деңгейде Түркістанда аталып өтетін болады.
Мәдениет және ақпарат министрлігі таратқан дерекке сүйенсек, биыл наурыздың бірегей логотипі бекітіліп, барлық аймаққа таратылған. Ұлыстың ұлы күнін тойлаудың жаңа дәстүрін қалыптастырып, оның мазмұнын идеологиялық мәнмен байыту үшін жыл сайын 14-23 наурыз аралығында өткізілетін «Наурызнама онкүндігі» жарияланған. Оның әр күні белгілі бір тақырыпқа арналып отыр.
14 наурыз – Көрісу күні немесе Амал мерекесін атап өту дәстүрі негізінде еліміздің батыс өңірлерінде сақталған.
15 наурыз – Қайырымдылық күні. Бұл күн ел бойынша қайырымдылыққа, мейірімге және көршілермен тату тұруға арналып отыр.
16 наурыз – Мәдениет және ұлттық салт-дәстүр күні. Бұл күн мәдениетімізді, өнеріміз бен ұлттық құндылықтарымызды насихаттауға арналып, республика бойынша түрлі іс-шараларды өткізу жоспарланған.
17 наурыз – «Шаңырақ күні». Осы күні отбасылық құндылықтарды дәріптеуге, өнегелі ұрпақ тәрбиелеген үлгілі отбасыларға арналған мәдени іс-шаралар өтеді.
18 наурыз – Ұлттық киімдер күні. Наурызнаманың онкүндігінде еліміздің барлық өңірінде ұлттық киімдерді насихаттауға бағытталған түрлі іс-шара өткізу ұсынылып отыр.
19 наурыз – Жаңару күні. Осы күні көктемгі ағаш егу дәстүрін жалғастыру мақсат етілген.
20 наурыз – Ұлттық спорт күні. Бұл күні елдің барлық аймағында ұлттық спорттан түрлі жарыстар ұйымдастырылады.
21 наурыз – Ынтымақ күні. Оның басты мақсаты – жалпы халық арасында бір-біріне деген сый-құрметті арттырып, татулық пен бірлікті насихаттау.
22 наурыз – Жыл басы. Бұл күні еліміздің барлық өңірінде жалпыхалықтық мәдени-спорттық іс-шаралар өткізіліп, стильді этноауылдар мен түрлі жәрмеңке ұйымдастырылады. 14-23 наурыз аралығында «Наурыз-базарлық» маусымы жарияланады. Бұл күндері сауда орындарында жаппай сатылымдар өтеді.
23 наурыз – Тазару күні. Наурызнаманың қорытынды күні, жаңа жылды тұтас ел болып, жаңа мақсат, жаңа үмітпен қарсы алудың символы ретінде етіп жарияланды. Бұл күні Қазақстанның барлық аймақтарында жалпыұлттық экологиялық акция өтеді.
«Қазақстан темір жолы» ұлттық компаниясының жүз мыңдаған үлкен ұжымы Наурызнама онкүндігін жоғары деңгейде атап өтуде. Амал мерекесін Атырау атырабынан бастап, кәрі түбек Маңғыстау тойлап, Оралда көрісу күні жалғасын тапты. Ал қайырымдылық жасаудан теміржол жастары ешқашан қалыс қалған емес. «Шаңырақ күніне» «Жолаушылар тасымалы» АҚ ерекше дайындықпен келді. Олар өздері отыратын қабатта киіз үй тігіп, қазақтың ұлттық тағамдарынан дастархан жайыпты. Ал Ұлттық киімдер күні бүкіл теміржолда керемет насихатталып, бұл күні барлық қызметкерлер жұмысқа ұлттық киімде келіп, қыз келіншектердің алуан нақыштағы әшекей бұйымдары көздің жауын алуда.
«ҚТЖ» компаниясы биыл Наурыз мейрамын еліміздегі көне шаһарлардың бірі Түркістанда атап өтеді. Жаңару күні аясында өтетін мерекелік шара ағаш отырғызудан басталмақ. Сонымен қатар Қожа Ахмет Яссауи кесенесі маңындағы этноауылда «ҚТЖ» ҰК» АҚ және оның еншілес ұйымдары ақшаңқан үй тігіп, қазақтың салтдәстүр, әдеп-ғұрыптары кеңінен дәріптелетін болады. Түркі жұртының рухани астанасында бір ғажайып тойдың болары анық...