Теміржолшылар мемлекеттік тілден тест тапсыруда

Компания қызметкерлері ҚР тіл саясатын дамытудың 2023-2029 жылдарға арналған тұжырымдамасын іске асыру жөніндегі іс-жоспарға сай «Қазтест» жүйесі арқылы диагностикалық тестілеуден өтуде.

Былтыр бұл тесттен тек Астанада ғана 100 адам өтсе, биыл жоспарда бүкіл өңірлерді қамти отырып, жалпы 3000 адамды диагностикалық тестілеу көзделіп отыр. Тесттің былтырғы нәтижесі бойынша ҚТЖ қызметкерлерінің 92 пайызы мемлекеттік тілді В1 және одан жоғары деңгейде білетіні анықталған. Ол кезде Орталық аппараттың, түрлі құрылымдық бөлімшелер мен филиалдар және еншілес ұйымдардың 100 қызметкері сынаққа қатысып, жазбаша түрде 1,5-2 сағат тест тапсырған. Тест сынақтары аудио тапсырма, лексикалық-граматикалық ережелер мен оқудан тұрды. Жалпы барлығы 100 сұрақ келеді. 20-39 балл жинағандар А1 деңгейіне, 40-59 балл жинағандар А2 деңгейіне, 60-74 балл алғандар В1, 75-89 балл алғандар В2 және 90-100 балл жинағандар С1 деңгейіне сәйкес келеді. Сол кезде ҚТЖ-ның 100 адамының 92-сі В1 деңгейін көрсеткен. 17 адам қазақ тілін С1 деңгейінде, 52 адам В2 деңгейінде білген.  

Компанияның мемлекеттік тілді дамыту секторының меңгерушісі Ербол Тоқтағазының айтуынша, биыл бұл тестті Семей, Жамбыл, Ақтөбе, Қарағанды, Алматы, Жетісу, Қостанай, Атырау өңірлерінің теміржолшылары 8 сәуір мен 30 мамыр аралығында сол облыстардың оқу орындарында тапсырады. Ең бірінші Семейде өтіп, оған 77 теміржолшы қатысқан.  

– Біздің Семей магистральдық желі бөлімшесінен 50 адам қатысты. Олардың көбі біздегі құрылымдық бөлімшелердің басшылары мен бас инженерлері, орынбасарлары. Қазақы өңірдің азаматтары үшін тест сұрақтары аса қиын дей алмаймын. Нәтижесін алда көреміз. Жалпы мұндай тест сынақтары мемлекеттік тіл саясатын жүргізуде қажет деп санаймын. Өз мекемемізде іс қағаздары да екі тілде жүргізіледі, іс-шаралар мен техникалық сабақтар да солай өтеді, – дейді Семей магистральдық желі бөлімшесі персоналды басқару жөніндегі бастығы Данияр Баймағұлов.  

Келесі кезекте, Жамбыл, Ақтөбе өңірлерінің теміржолшылары мемлекеттік тілді білу деңгейін көрсетті. Қалған облыс мамандары мамыр айының соңына дейін тесттен өтетін болады.