Астанадағы ескі вокзал жөнделеді
«Қазақстан теміржолшысы» газетінің тілшісі
Тамыз айында елордадағы ескі теміржол вокзалында күрделі жөндеу жұмысы жүргізіледі.
Бұл туралы Amanat партиясының «Кедергісіз келешек» жобасы аясында өткен партиялық бақылау комиссиясының көшпелі отырысында айтылды. Партиялық бақылау комиссиясының мүшелері мен мәслихат депутаттары «Нұр-Сұлтан-1» теміржол вокзалындағы мүмкіндігі шектеулі жандарға арналған қызметтер сапасына мониторинг жүргізді. Оның барысында вокзалдағы арнайы демалыс бөлмелері мен дәретханалардың тозығы жеткені анықталды. Мүгедектер арбасына арналған жол мен арнайы сатылар, демалыс бөлмелері мен әжетханалар күрделі жөндеу мен заманауи жабдықтауды қажет ететінін көрсетті.
– Біздің мақсатымыз – тұрғындар көтерген мәселелердің оң шешімін табу. Мемлекет басшысының тапсырмасына сәйкес, біз мүмкіндігі шектеулі жандардың өмір сапасын жақсарту үшін мониторинг жұмысын ұдайы жүргізіп тұрамыз, – деді Amanat партиясы Астана қалалық филиалының атқарушы хатшысы Мұхаммед Болысбек.
«Нұр-Сұлтан-1» теміржол вокзалы 1961 жылдан бері қолданыста. Мұнда соңғы рет күрделі жөндеу жұмысы 20 жыл бұрын жүргізілген. Вокзал басшылығының мәліметіне сәйкес, күрделі жөндеу жұмысы ағымдағы жылдың тамыз айына жоспарланған. Құрылыс жұмысының нәтижесінде вокзал толықтай заманауи жабдықтармен қамтамасыз етілмек. Вокзалда мүмкіндігі шектеулі жандар үшін 2 жеделсаты, қызметкерлерді шақыру тетігі, арнайы демалыс бөлмесі мен дәретхана, пиктограмма мен индукция штаттық режимде жұмыс істеп тұр.