Еңбек түбі – зейнет

Жаңалықтар

13.06.2016, 10:20

Атырау магистральдық желі бөлімшесінің ұжымы бөлімше филиалы болып табылатын Мақат қалпына келтіру пойызында көп жылдар еңбек етіп, зейнеткерлік жасына жеткен үш теміржолшыны құрметті еңбек демалысына шығарып салды. Аталмыш шарада Атырау магистральдық желі бөлімшесі директорының орынбасары Жанат Жартыбаев, персонал жөніндегі менеджері Анар Жалғасбаева, аталған бөлімшенің кәсіподақ ұйымының төрағасы Нәсіп Әліпқалиева, Еңбекті қорғау және қауіпсіздік жөніндегі жетекші инженері Алла Плотникова әріптестері туралы жылы лебіздерін білдіріп, той иелеріне жүрекжарды тілектерін жеткізді. Темір жол саласын өркендетуге зейнеткерлікке шығып жатқан әр теміржолшының өзіндік үлесі бар екенін айтады әріптестері. Мысалы, Атырау өңіріндегі Қызылқоға ауданы, Сағыз станциясында дүниеге келген Төлеген Әбдірашев темір жол саласында қырық екі жыл тер төккен. Алғашқы еңбек жолын Жол машиналары станциясының (ПМС) жол монтері қызметінен бастаған ол 2001 жылдан бері Атырау магистральдық желі бөлімшесінің Мақат станциясы қалпына келтіру пойызының машинист бульдозер лауазымын атқарып келген. Ал екінші мерейтой иесі Жолдасқали Нұрекеновтің темір жол саласында еңбек етіп, суығы мен ыстығына бірдей жүргеніне 33 жыл болыпты. Ұл-қыз өсіріп, оларды құтты орындарына қондырған Жолдасқали ендігі өмірін немерелерінің тәрбиесіне арнамақ. Аталған ұжымда өзге ұлт өкілдерінің де бір атаның баласындай ауызбіршілікпен еңбек етіп, Атырау темір жолының тынысын кеңейтуге атсалысуы көңілге қуаныш ұялатады. Солардың қатарында, зейнеткерлік жасына жетіп, көп жылғы еңбегінің зейнетін көруге қадам басқан Степан Ильченко бар. Ол Мақат локомотив депосында тепловоз машинистінің көмекшісі, ал 1986 жылдан бері Мақат станциясы қалпына келтіру пойызында тракторист болып еңбек етіпті. Салтанатты шарада сөз алған Атырау магистральдық желі бөлімшесінің персонал жөніндегі менеджері Анар Жалғасбаева: –Сіздер өз еңбек жолыңызда талай белеске шығып, ағайын-туыстарыңыздың, ұжымның және достарыңыздың құрметіне бөлендіңіз. Өз жұмыстарыңызды абыроймен атқара жүріп, тәжірибелі маман ретінде білгендеріңізді кейінгі толқын жастармен бөлісіп, әркез үйретуден жалықпадыңыздар. Сіздердің өрелі істеріңізді айтқанда ауыз толады. Өйткені, Сіздердің өмірлеріңіз нағыз майталман маманның, ұлағатты әкенің, еліміздің абзал азаматының өнегесі, –дей келе, ардагер теміржолшылардың деніне саулық, ұрпақ қызығын көруді тіледі. Шара соңында үш зейнеткерге ұжымдастары ақжарма тілектерін айтып, бағалы сыйлықтар мен алғыс хаттар табыстады.

Еңбек түбі – зейнет

Басқа да жаңалықтар

Қазақстан теміржолшысы газеті, №75 22 қыркүйек 2026 жыл