Теміржолшы ғимаратты өрттен сақтап қалды

Апат айтып келмейді дегендей, тілсіз жау өрт –  кенеттен болатын нәрсе. Доссор станциясына жақын №441-разъезде өрт оқиғасы орын алып, абырой болғанда станция кезекшісінің арқасында ғимарат өрттен аман қалды.

Шағын ғана разъез пойыз көп тоқтайтын не жүк түсірілетін станция емес, өтпелі қызмет атқарады. Бірақ өңірдегі жүк және жолаушылар пойызының дені  нақ осы жол арқылы өтеді. ЭЦ пост орналасқан ғимаратта кешкісін кезекшілік міндетін атқарып отырған Гүлнар Байбосынова кенет түтіннің иісін сезеді. Келесі бөлмеге барса, электр желісі түтіндеп, бөлме іші тұманданып кеткен. Егер өрт болса, онда бүкіл ғимарат, бүкіл ЭЦ посты қызыл жалынға оранып,  жағдай қиын болып кететіні белгілі. Гүлнар қою түтіннің арасымен жүгіріп өтіп алдымен терезелерді ашады.  Келесі кезекте  СОБ электр қуатын, станция батарея аккумляторларын тоқ көзінен ажыратады. Сосын сүймен алып келіп, өртеніп жатқан тоқ желісін тартып үзеді. Яғни, сымның онан әрі жайылып жануына мүмкіндік бермей, өрт қаупінің алдын алып үлгереді. Содан кейін барып демін алып, станция бастығына жағдайды шұғыл хабарлайды.  

Әрине, бүлінген құрылғылар  қалпына келтіріліп, электр желілері жөнделіп, бірер сағатта жылдам іске қосылды, пойыздар қозғалысына кедергі келтірілген жоқ. Теміржолшылар төтенше  жағдайда абдырап қалмай шұғыл әрекет етіп, тіпті жеке басына қауіп төнсе де станцияны өрттен аман алып қалған  Гүлнардың батылдығына риза болды.  Бөлімше басшылығы Гүлнар Байбосынованы   Алғыс хатпен марапаттады.