Әлемде теміржол көлігі анағұрлым экологиялық таза көлік түрі
«Қазақстан теміржолшысы» газетінің тілшісі
«ҚТЖ» ҰК» АҚ «Магистральдық желі дирекциясы» филиалы «ESG қағидаттарын ұстану – табыс жолы» тақырыбында дөңгелек үстел өткізді. Алдымен дирекцияның бас инженері Қайырбай Орынбаев сөз алып, биылғы жылы өткізілген экологиялық акциялар туралы мәлімет берді.
– Бүгінгі таңда ESG ғаламдық ауқымда маңызды рөл атқарады. Экология мәселесі, әлеуметтік жауапкершілік және корпоративтік басқару жүйесінде ESG компанияның бір бөлігіне айналды. Біздің дирекция компанияның ESG рейтингін дамытуға көп үлес қосуда. Темір жол көлігі нысандарының қоршаған ортаға зиянын азайту үшін Табиғатты қорғау іс шараларының жоспары орындалады, ол 21 іс-шарадан тұрады, одан бөлек қызметкерлеріміз қалдықтарды сұрыптау бойынша жұмыстар жүргізеді, қазіргі таңда 2 521 кг – макулатура, 39 кг – пластик, 3 425 кг – аккумулятор батареялары, 725 кг – өңделген оргтехникасы өткізілді, жұмыстар жалғасуда, – деді ол.
Мәселен, биыл 26 наурыз бен 26 сәуір аралығында «Су-тіршілік нәрі» айлығы өтіп, 5 маусымда өндірістік департаменттерде «Гүлден жер беті жайнайды» акциясы ұйымдастырылған. Сонымен қатар дирекция филиалдарында «Қалдықтарды қалай тастау жөнінде ереже» тақырыбында челледж іске қосылған.
Оған қоса 2768 түп ағаш пен гүл отырғызылып, жасыл аймақтар құрылған. Одан әрі дирекцияның өндірістік қауіпсіздік және экология департаментінің бас менеджері Сағат Қабиев және Адами ресурстарды басқару департаментінің HR бизнес серіктесі Аида Айсариева және Комплаенс қызметінің комплаенс-бақылаушысы Бекет Ақпан тақырып аясында баяндама жасады.
– Жалпы әлемде теміржол көлігі анағұрлым экологиялық таза көлік түрі болып саналады. Биыл Еуропа даму және қайта құру банкі климаттық тәуекелдерді басқару мәселелері бойынша ҚТЖ-ны қолдау мақсатында консультанттар тартуға грант бөлуге шешім қабылдады. Грант бөлу мақсаты – ҚТЖ-ның осы бағыттағы корпоративтік басқару саласын жақсарту, климаттық тәуекелдерге тұрақтылықты арттыру бойынша іс-қимыл жоспарын әзірлеу. 2022 жылы желтоқсан айында ҚТЖ басқармасының шешімімен «2060 жылға дейін «ҚТЖ» ҰК» АҚ мен оның еншілес ұйымдарында төменгі көмірқышқылды дамыту тұжырымдамасы» бекетілді, – деді С. Қабиев.
Жиын соңында Қ. Орынбаев ESG бойынша символикалық жалаушасын «Жолаушылар тасымалы» АҚ өкілдеріне табыстады және баяндама жасаған спикерлерге ESG тақырып аясында ағаштан жасалған естелік сувенирлер сыйға берді.