ШЫҰ саммитінде ТХКБ-ны дамыту құжатына қол қойылды
«Қазақстан теміржолшысы» газетінің тілшісі
Астанада өткен ШЫҰ саммиті әлем назарын тіккен айтулы оқиға болды. Жиын барысында Қазақстан Президенті Қасым-Жомарт Тоқаев пен ҚХР Төрағасы Си Цзиньпин көлік-логистика саласындағы ынтымақтастық туралы мәселе қозғап, ТХКБ-ны дамытуына құжатқа қол қойды.
Қазақстан мен Қытай басшылары Транскаспий халықаралық көлік бағдары бойынша жүк көліктері мен теміржол контейнерлерін жөнелту рәсіміне телекөпір режимінде қатысты. Қатысушыларға Ұлы Жібек жолы бағытымен жүретін транзиттік рейс туралы бейнеролик көрсетілді. Шара соңында Қасым-Жомарт Тоқаев пен Си Цзиньпин жүк паромдарының қозғалысын іске қосты.
Сондай-ақ, екі ел басшысы ҚР Көлік министрлігі мен Қытайдың Реформалар және даму мемлекеттік комитеті арасындағы Транскаспий халықаралық көлік бағдарында жүк тасымалдауды арттыруға және дамытуға арналған ынтымақтастықтың жұмыс тетігін құру бойынша өзара түсіністік туралы, сондай-ақ трансшекаралық теміржолды кеңейту жөніндегі өзара түсіністік туралы меморандумдарға қол қойды.
Мемлекет басшысы ҚХР Төрағасымен кездесуде көлік-логистика саласындағы ықпалдастықты жандандыру қажеттігіне назар аударғанын, сонымен қатар Си Цзиньпиннің Астанада жариялаған жаһандық «Бір белдеу, бір жол» бастамасы және Транскаспий халықаралық көлік бағдары аясындағы ынтымақтастық мәселелері талқыланғанын жеткізді.
– Былтыр теміржол арқылы тасымалданатын жүк көлемі 22 пайызға артып, 28 миллион тоннаға жетті. Бұл – рекордтық көрсеткіш. Ляньюньган, «Қорғас – Шығыс қақпасы» және Сиань қаласындағы құрғақ порттарда жүзеге асырылған бірлескен жобалардың нәтижесінде көлік-логистикалық әлеуетіміз едәуір артты. Қазіргі таңда «Аягөз – Бақты» үшінші трансшекаралық темір жол құрылысы белсенді жүріп жатыр. Бүгін біз Транскаспий халықаралық көлік бағдары арқылы жүк тасымалын іске қосу шарасына бейнебайланыс режимінде қатыстық. Бұл бағдар Еуразия құрлығындағы көлік-логистика қатынастарын дамытуға тың серпін береді, – деді Мемлекет басшысы.
Сонымен қатар ШЫҰ саммитіне келген Әзербайжан Президенті Ильхам Әлиевпен кездесуде де екі ел басшылары инвестиция, өнеркәсіп, энергетика, көлік және логистика салаларындағы бірлескен жобалардың жүзеге асырылу барысын талқылады. Мұнда да Транскаспий халықаралық көлік бағдарын тиімді пайдалану мәселесіне айрықша назар аударылды.