Астана әкімі вокзал маңындағы аумақ қалай абаттандырылатынын айтты
Астана қаласының әкімі Жеңіс Қасымбек Instagram парақшасында вокзал маңындағы аумақты абаттандыру мәселесі туралы айтты, деп хабарлайды Rail-news.kz.
«Елордамызды құлпырту бойынша ауқымды жұмысты ары қарай жалғастырамыз. Бірер күн бұрын қалада тағы 40-тан астам аула мен қоғамдық кеңістік аштық. Биыл барлығы 170 аула мен қоғамдық аумақты абаттандыруды жоспарлап отырмыз. Бұл жұмыспен қаланың барлық ауданы қамтылды», - деп жазды әкім.
Оның айтуынша, биыл қаланың вокзал маңындағы бөлігін және іргелес тұрған Біржан сал мен Гете көшелерін абаттандыру жобасын іске асырылады. Вокзал маңындағы көшелердің жалпы ұзындығы – 1,5 км. Сондай-ақ, мұнда 5 қоғамдық кеңістікті абаттандыру жоспарланып отыр: Жастар театрының алдындағы алаң, Ақжайық қонақ үйінің алдындағы аумақ, «Хлебник» наубайханасының алдындағы алаң, Чемодандар паркі және «Паровоз» гүлзары.
«Қаланың тарихи бөлігінің тұжырымдамасы аясында абаттандырудың классикалық стилі қолданылады, оның ішінде жарықтандыру тіректерін, көше жиһаздарын орнату, жасыл желектерді кешенді отырғызу», - деді Жеңіс Қасымбек.
Қаланың тарихи көшелерін реконструкциялау жобасы аясында жалпы абаттандыру алаңы 17 мың шаршы метрден асады.