Ұлы Абайды ұлықтады

«ҚТЖ» ҰК» АҚ Мемлекеттік тілді дамыту секторы «Абай – қазақ болмысының айнасы» атты мәдени-танымдық іс шара өткізді. Жиынға компания қызметкерлері мен тіл жанашырлары және ЖОО профессорлары мен мамандары қатысты.

Іс-шараға «ҚТЖ» ҰК» АҚ мен оның еншілес ұйымдарында мемлекеттік тіл саясатын іске асыру жөніндегі комиссия төрағасының орынбасары Ілияс Ерназаров модераторлық етті. Абайдың өлеңдері мен қарасөздерінен бейнеролик көрсетіліп, теміржолшылар ақынның шығармаларын жатқа мәнерлеп оқыды. Сырттан шақырылған қонақтардың қатарында ҚР Ғылым және жоғары білім министрлігі Тіл саясаты комитеті төрағасының орынбасары Ғабит Абзалбек, Л.Н.Гумилев атындағы Еуразия ұлттық университетінің профессоры Мақсат Алпысбес, осы университет жанындағы «Абай академиясы» ҒЗИ бөлім басшысы Алтынай Асқарова сөз алып, һәкім Абай шығармашылығындағы ерекшеліктер мен философиялық тұжырымдардың бүгінгі күндегі мәні мен маңызы туралы баяндады. Ұйымдастырушылар тарапынан ақын өмірі мен шығармашылығына байланысты сұрақтар бейнежазба арқылы дайындалып, соған дұрыс жауап бергендерге Абайдың құнды кітаптары сыйға тартылды. Өнерлі теміржолшылар ақынның танымал әндерін орындап, күй тартып көпшілікті тәнті етті. Мәдени кеште талантымен танылған қызметкерлер көп болды. «Көпфункционалды қызмет көрсету орталығы» филиалының менеджері Әсем Сүйеуғазықызы, «КТZ Express» АҚ Салық және бухгалтерлік есеп департаментінің бас менеджері Гүлназ Мұхаметкәрімқызы, «Жол диагностикасы орталығы» филиалының Мобильді диагностикалық кешені басшысының орынбасары Темірлан Абзалұлы ақынның ел аузында жүрген өлеңдерін нақышына келтіре оқыды.  

– Абай Құнанбайұлының 179 жылдығына арналған мәдени-танымдық іс-шарамызды «ҚазАвтоЖол» ҰК» АҚ ұсынысы бойынша олармен бірлесіп өткізуді жөн көрдік. Біздің сектордың міндеттерінің бірі – компанияда ана тіліміздің қолданылу аясын кеңейту, осы тұрғыда тамыз айында дүниеге келген ұлы ақынның шығармашылығы арқылы да іс-шаралар ұйымдастырудың тиімділігі зор, – дейді Мемлекеттік тілді дамыту секторының бас менеджері Меруерт Болатбайқызы.  

Жиын соңында «Көпфункционалды қызмет көрсету орталығы» филиалы кәсіподақ комитетінің төрайымы Күләш Қабдырашитқызы сөз алып, мұндай іс-шаралардың бүкіл ел аумағында қалай ұйымдастырып жатқанына тоқталды және өнер көрсеткен қызметкерлерге кәсіподақ атынан сыйлыққа сувенир-кітаптар тарту етті.