316 мыңнан астам мүмкіндігі шектеулі жан ҚТЖ пойыздарымен жүрген
«Жолаушылар тасымалы» АҚ-да мүмкіндігі шектеулі жолаушыларға, оның ішінде арба қолданатындарға арналған арнайы купесі бар 95 вагон пайдаланылады. Мұндай вагондарда жолаушылардың арбамен вагонға кіріп шығуына мүмкіндік беретін көтергіш құрылғылар орнатылған, деп хабарлайды Rail-news.kz.
Арнайы купеге билетті вокзалдардағы «Жолаушылар тасымалы» АҚ кассаларынан немесе https://bilet.railways.kz/ сайты арқылы сатып алуға болады. Билеттерді рәсімдеу үшін ЖСН және мүгедектігін растайтын құжатты ұсыну қажет. Арнайы купелерде мүмкіндігі шектеулі жандар жеке немесе қасында ертіп жүрген адаммен бірге сапар шеге алады.
«Мүмкіндігі шектеулі жандарға арналған купесі бар коммерциялық және «Тальго» пойыздарында барлық мүгедектік топтар үшін, сондай-ақ, оларды ертіп жүрген адамдарына билетке 50% жеңілдік беріледі», – делінген Жолаушылар тасымалы таратқан мәліметте.
Арнайы купеде екі жататын орын, тұтқалар мен қолжуғышы төмен орнатылған жуыну бөлмесі бар. Сондай-ақ, арнайы жиналмалы тұтқалар, шектеу құрылғысы, құлаудан сақтайтын қолдаушы белдіктер қарастырылған. Купе жолаушының өздігінен орын ауыстыруына мүмкіндік беретін қосымша белдіктермен және төтенше жағдайларда жолсерікті шақыру батырмасымен жабдықталған.
Арнайы купенің техникалық жағдайы пойыздың рейске шығуына дейін әр сапар алдында тексеріледі. Техникалық қызмет көрсетуді мамандандырылған компания жүзеге асырады.
Жолаушылар вагондарының жолсеріктері мен пойыз бастықтары мүмкіндігі шектеулі жолаушыларға қызмет көрсету мәселелері бойынша арнайы оқытудан өтеді.
Вокзал қызметкерлері мүмкіндігі шектеулі жандарға пойызға отыру және шығу кезінде көмек көрсетеді.