Әлемдік рекордты жаңартқандар

Төрткүл әлемді дүбірлеткен V Дүниежүзілік көшпенділер ойыны да мәресіне жетті. Қазақстанның астанасына ағылған шетелдік қонақтар ат жарыс, жамбы ату, көкпар сынды ұлттық ойындарды тамашалаумен қатар, көшпенділер өркениетінің мұрагері қазақ ұлтының қолөнерімен танысты.

Көшпенділер ойыны аясында өткен көрмеде қазақтың ұлттық құндылықтарын әлемге паш етуге атсалысып, рекорд жаңартқан «Аламан құрақ» жобасы болды. Еліміздің 19 аймағынан жиналған 450 ісмер жалпы көлемі 11 200 шаршы метрлік көздің жауын алатын көрпені құрап, көрген жанның бәрін таң қалдырды. Ісмер құрақшылар арасында маңғыстаулық теміржолшы әйел де бар. Он бес жылдан бері Жетібай станциясында жүк және багаж қабылдап-тапсырушы болып жұмыс істейтін Күнсұлу Медетбаева көшпенділер ойындары аясында республикалық «Аламан құрақ» жобасына қатысуға шақырту алған. Он саусағынан өнері тамған Күнсұлу апамыздың бір басына жететін бірнеше «мамандығы» бар. Теміржол саласының маманы қоғамдық өмірде табысты кәсіпкер, жұртқа өнегелі ұстаз. «Асыл мұра» оқу орталығын ашып, еліміздің түкпір-түкпірінен қолөнер шеберлерін даярлап келеді. Өмірлік серігі Маңғыстау жол дистанциясында жол монтері Зорбай Қанкөшековпен екеуі төрт бала өсіріп, екі келін түсірген, әулетіне сыйлы ана. Үлкен отбасында қазақи салтдәстүрді жаңғыртып, немерелерін де жастайынан өнерге баулып жүрген Күнсұлу апаның есімі батыс өңіріне танымал.  

– Құрақ құрап, көрпе тігу – бала күнгі хоббиім болатын. Бұл кәсіппен шындап айналыса бастағаныма 39 жылға қарапты. Біраз жылдан бері білгенімді бөлісіп, шәкірт тәрбиелеуді қолға алдым. Соңғы 14 жылдан бері ұлттық қолөнер бұйымдарын тігуден сабақ беріп, ұстаздық етемін. «Асыл мұра» оқу орталығын ашқалы мыңдаған қыз-келіншекті қөлөнерге баулыдым. Оларға ұлттық мұрамыз – қолөнер бұйымдарын дайындауды онлайн және офлайн форматта үйретіп келемін. Өзім Қолөнер «URSHIK» республикалық қоғамдық бірлестігінің Маңғыстаудағы филиалының директоры ретінде осы саланы жүрген жерімізде дәріптеп жүремін. Құрақшылар қауымдастығы ұйымдастыратын «Аламан құрақ» жобасына өткен жылы маңғыстаулық көлөнершілерді бастап барып, Қазақстан рекордтар кітабына кірген едік. Биыл Маңғыстаудан 26 шебер бір мезетте 450 көрпенің тігілуіне қатыстық. Еліміздің 19 аймағынан 450 адам болып жалпы көлемі 11 200 шаршы метрлік көрпені құрап бітіру оңай шаруа емес. Оны тігу барысында «Гауһартас», «Аламан», «Сынық мүйіз» құрақ техникалары және төртқұлақ, қошқармүйіз, өсімдік оюлары қолданылды. Бұл рекорд «КИНЭС» Қазақстан рекордтар кітабына сегізінші қыркүйек күні тіркелді. Ол сертификатымызды қолымызға алдық. Ал әлемдік рекордты жаңартқан сертификатымыз екі айдан соң дайын болатын көрінеді, – дейді Күнсұлу Бектұрғанқызы.