Алашаңқайда Қазақстан мен Қытай темір жолдары делегацияларының кездесуі өтті
Алашаңқай станциясында ҚР мен ҚХР теміржол делегацияларының кездесуінде Достық - Мойынты учаскесінде пойыздардың өткізілуін ұлғайту мәселесі талқыланды, деп хабарлайды Rail-news.kz.
Қазақстандық делегацияны "ҚТЖ-Жүк тасымалы" ЖШС бас инженері Марлен Көкірекбаев, Қытай тарапын - "Үрімші темір жолы" ЖШҚ халықаралық тасымалдау департаментінің директоры Ли Кай бастап барды.
Номенклатуралық жүктерді тасымалдау және беру шарттары бойынша пікір алмасты. Достық-Алашаңқай аралығында екінші жол салу мәселелері және Достық - Мойынты учаскесінің өткізу қабілетін кезең-кезеңімен арттыру мүмкіндігі қаралды:
- осы жылдың 1 желтоқсанынан бастап - 24 пойызға дейін,
- 2025 жылғы 1 шілдеден бастап - 40 пойызға дейін,
- 2026 жылғы 1 қаңтардан бастап - 60 пойызға дейін.
Осы мәселе бойынша түпкілікті шешім осы жылдың қазан айында Қазақстан мен Қытай темір жолдарының аралас комиссияларының кеңесінде айтылатын болады.