Оқушылар темір жол қызметімен танысты
«Қазақстан теміржолшысы» газетінің тілшісі
Өткен аптада «Quantum» мектебінің бір топ оқушысы «ҚТЖ» ҰК» АҚ бас кеңсесінде қонақта болып, Орталық теміржолшылар музейі мен Пойыздар қозғалысын басқарудың автоматтандырылған орталығын аралады.
Теміржолшылар музейінің менеджері Ақмарал Молдашева жас өрендерді тарихи жәдігерлермен таныстырды. Олар локомотивтердің алуан түрін көріп, жез қоңырауды соғып көріп, «сиқырлы» көне орындыққа отырып, тілек тіледі. Станция бастығының орындығына отырып, өздерін болашақ «станция бастығы» сезінген балалар да болды. Тарихы 1904 жылдан басталатын шойын рельстерді кезек-кезек балғамен соғып, жолшы болып та көрді.
Теміржолшы әулеттерінің өмір және еңбек жолдарын сипаттаған мәуелі бәйтерек сипатындағы стенд те балаларды қызықтырғаны анық. Бұдан кейін олар екі командаға бөлініп, пазл жинап жарысты. Сосын музей менеджерінің қолынан естелік сыйлық алып, теміржолшы спортшылардың жетістіктерін айшықтаған марапаттар мен алтын түстес кубоктар орнатылған стенд жанында суретке түсті.
Балаларды қатты қызықтырған 34-қабатқа дейін көтеріліп, қаланың сырт келбетін тамашалауға мүмкіндік беретін шыны жеделсаты болды. Пойыздар қозғалысын басқарудың автоматтандырылған орталығы – АЦУП ғимаратында диспетчерлер жұмысымен танысу да оларға айрықша әсер сыйлады. «ҚТЖ-Жүк тасымалы» ЖШС-ның Тасымалды ұйымдастыру департаментінің шұғыл-тарату тобының менеджері Наталья Гофман бұл орталықта Қазақстанның барлық өңірінде жүріп жататын жүк және жолаушылар пойыздарының қозғалысы басқарылатынын, пойыздар жылдың төрт мезгілінде, яғни ауа-райының қолайсыз күндері де тоқтамай жүре беретін ең сенімді көлік түрі екенін егжей-тегжейлі айтып берді. Сонымен қатар ол теміржол көлігіне бір мезетте жүзге жуық вагондарды тіркеп, сан түрлі жүктерді тасымалдауға болатынын жеткізді. Балаларға адамдар мен малдың жолға шығып кетуі қозғалыс қауіпсіздігін бұзып, қауіп төндіретінін, сондай-ақ пойызға мінерде перронда және пойыз ішінде де қауіпсіздік ережелерін сақтауды ұмытпау керектігін ескертті.
Кездесу соңында балалар диспетчер ағайлармен суретке түсіп, әбден риза болып қоштасты.
