Теміржолшылар арасында зияткерлік ойын өтті

«ҚТЖ» ҰК» АҚ Мемлекеттік тілді дамыту секторының ұйымдастыруымен теміржолшылар арасында қазақ тілінде тұңғыш «Quiz» зияткерлік ойыны өтті. «Ахмет Байтұрсынұлы – тіл білімінің атасы» тақырыбында өткен білім сайысына теміржол қызметкерлерінен тұратын 8 команда қатысты.

«ҚТЖ» ҰК» АҚ аппарат басшысы Серік Кеулімжаев мемлекеттік тіл аясын кеңейту бағытындағы мұндай іс-шаралардың маңыздылығына тоқталып өтіп, қатысушыларға сәттілік тіледі. Сонымен қатар алдағы уақытта «Самұрық-Қазына» АҚ портфельді компаниялары арасында өтетін «Жайдарман» ойындарына қатысты ұсыныстар күтетінін жеткізді.  

Квизда 4 адамнан құралған әр команда екі кезең бойынша интеллектуалдық және логикалық сұрақтарға жауап берді. Бірінші «Сөзжұмбақ» кезеңінде 8 минутта логика мен нақты деректерге негізделген 6 сұраққа жауап берілсе, «Байланыс» деп аталған екінші кезеңде сұрақтардың бәрінің жауабы бір тақырыпты қамтып, әр сұраққа 1 минут уақыт берілді. Сұрақтар мазмұны қазақ әдебиеті мен салт-дәстүрлеріне, наным-сенімдеріне, әндеріне, өнеріне қатысты болды. Мәселен, бір сурет сұрақта «Қанапия Телжановтың мына картинасы 1970 жылы жазылған әнмен де, белгілі отандық квазимемлекеттік ұйыммен де аттас. Оны біріккен сөзбен атаңыз» делінген. Оның жауабы – «Атамекен» сөзі болды. Осылайша қатысушылар әрбір сұрақ астарына логикалық тұрғыда үңіле отырып, жауап табуға тырысты.  

Мемлекеттік тілді дамыту секторының меңгерушісі Ербол Тоқтағазы нәтижесінде «Алаш арулары» командасын Алғыс хатпен, «Баян сұлу» және «Қазақ әдебиеті» командасын ынталандыру сыйлығымен марапаттады. Үшінші орын «Нурикамал» және «Тіл жанашырлары» тобына берілсе, екінші орынды «Алаш ЦЖС», «Алаш» топтары иеленді. Ал барлық сұрақтарға толымды жауап берген «Қуырдақ» командасы жеңімпаз атанды. Барлық қатысушылар электрондық техникалық бұйымдар бойынша бағалы сыйлықтарға ие болды.  

– «Quiz» өте қызықты өтті. Түрлі бағыттағы логикалық сұрақтар қызық болды. Қатысқаныма өте қуаныштымын. Себебі бірбірімен байланысып жатқан әрбір сұрақтың жауабын табамын деп отырып, уақыттың қалай өткенін білмей қаласың. Таным көкжиегімізді біраз кеңейтіп, жақсы әсер алдық, – дейді «ҚТЖ» ҰК» АҚ техникалық орталығы директорының орынбасары Думан Елубек.