Мерейін үстем еткен марапат

Республика күні қарсаңында аймақ теміржолының өркендеуіне сүбелі үлес қосу арқылы әріптестеріне үлгі бола білген жүзге жуық теміржолшы қос бөлімшенің басшылары Батырхан Базарбаев пен Ербол Сәулебековтің қолынан «Қазақ теміржолына-120 жыл» мерейтойлық төсбелгісін алды.  

Еліміздің теміржол саласы өзінің 120 жылдық тарихында көптеген белестерді бағындырып, өзінің алпауыт компания екенін мойындата білді. Теміржолдың дамуына өз үлесін қосқан аймақтың әрбір теміржолшысының ерен еңбегі еш уақытта елеусіз қалған емес. Бұл жолы да Қызылорда ЖТ бөлімшесінен 36 сала еңбеккеріне, Қызылорда магистральдық желі бөлімшесінен 44 теміржолшыға құрмет көрсетіліп, кеуделеріне төсбелгі тағылды.

Сонымен қатар мереке қарсаңында Қазалы вагон пайдалану депосында Арғын Орымбаев үздік вагон қараушыларға атқарған жұмыстарына рахмет айтып, өз ісінің озаттарын марапаттап, кеуделерін жарқыраған мерейтойлық белгімен көмкерді.  

– Биыл Қазақстан темір жолына 120 жыл. Елдің бірлігі мен тәуелсіздігінің символына айналған Республика күні қарсаңында  компанияның дамуына және жұмыста жоғары нәтижелер көрсетіп, қозғалыс қауіпсіздігін қамтамасыз етуге елеулі үлес қосқан азаматтарды мерейтойлық медальмен марапаттауды жөн көрдік. Әрине вагон депосының әрбір қызметкерге марапатқа лайық. Бірақ бұл жолы ең озат деген қызметкерлер марапатталып отыр, – деді депо бастығы Арғын Орымбаев.

Сонымен Қазақстан темір жолының 120 жылдығына арналған мерейтойлық медальді Қазалы вагон пайдалану депосына қарасты Сексеуіл техникалық қызмет көрсету бекетінің вагон қараушысы А.Жарболов, Қазалы техникалық қызмет көрсету бекетінің вагон қараушысы А.Қараманов, Төретам вагондарды техникалық тапсыру бекетінің вагон қараушысы Е.Бисенбаев, Бекбаулы бақылау бекетінің вагон қараушысы Н.Тлеукулов, Жаңақорған бақылау бекетінің аға вагон қараушысы А.Ақылбеков, депоның бас инженері А.Тынымбаев кеудесіне тақты. Мерейі үстем болған оларға медальдан бөлек,  мекемелердің кәсіподақ ұйымдары атынан бағалы сыйлықтар тапсырылды.