Алдағы 5 жылда 700-ден астам локомотив сатып алынады

Теміржол көлігі саласын дамытудың 2029 жылға дейінгі тұжырымдамасы аясында жүзеге асырылып жатқан жұмыстар туралы жуырда ҚР Көлік министрлігінің өкілдері 24.KZ телеарнасына сұхбат берді.

Спикерлердің айтуынша, Қазақстан географиялық орналасу тұрғысынан алып экономикасы бар алпауыт екі елдің, Қытай мен Ресейдің, оның әр жағында Еуропа елдерінің арасында жатыр. Осындай ірі мемлекеттермен шекаралас жатқан Қазақстан үлкен транзиттік хабке айналуы керек. Көлік министрлігінің алдында сондай міндет тұр.  

– Қазақстанды ірі хабке айналдыру үшін бізге біріншіден мықты инфрақұрылым керек, екіншіден вагондар мен локомотивтер жеткілікті мөлшерде болуы қажет. Одан басқа барлық шетелдермен түйіспе нүктелері де ауқымды жүк тасымалына дайын болуы тиіс. Бүгінде бұл бағытта ауқымды жұмыстар жүріп жатыр. Жалпы транзит көлемі жылдан жылға өсіп келеді. Биылғы жылдың өзінде 27 млн тонна транзиттік жүк тасымалданады деп отырмыз, бұл соңғы 10 жылға қарағанда екі есе артық. Ал контейнерлік транзит 5 есе артуда. Алға қойған жоспар бойынша транзиттік жүктерді жылына 45 млн тоннаға дейін, ал контейнерлік тасымалды 2 млн тоннаға жеткізу көзделуде, – дейді министрліктің теміржол және су көлігі комитеті төрағасының орынбасары Нұржан Келбұғанов.  

Сонымен қатар спикер локомотив шаруашылығының тозуы 2-3 жылда қатты байқалғанын, сол үшін биылдан бастап локомотив сатып алу қарқыны арттырылғанын жеткізді. Осы жылдың өзінде 185 локомотив алынды, келесі жылы 187 алынады, алдағы 5 жылда 700-ден астам локомотив сатып алынады. Олардың бәрі қазіргі заман талабына сай болады. Бүгінде вагон жетіспеушілігі жойылды деуге болады. Қазақстанда 139 мың вагон бар, жылдан жылға вагондар паркі жаңартылып, саны да артып келеді.  

Жалпы, ел аумағы арқылы 15 халықаралық дәліз өтеді. Оның бесеуі – теміржол дәліздері. Қазақстанда 16 мың км теміржол болса, 2029 жылға дейін соның 11 мыңы күрделі жөндеуден өтеді, әзірге 2800 км жөнделді. Аталған мерзім ішінде Қазақстанда жалпы 5 мың км теміржол салу жоспарланған. Сонымен қатар 184 станцияны қайтадан жаңғырту көзделуде.  

Спикерлердің айтуынша, бүгінгі таңда құрылысы жүріп жатқан 4 ірі жобаның Достық – Мойынты, Дарбаза – Мақтаарал, Алматы айналма жолы, Аягөз – Бақты темір жолдарының құрылысы, жалпы аумағы 1300 шақырымнан асатын теміржолдың Қазақстанды логистикалық транзиттік ірі хабке айналдырудағы рөлі зор болмақ.  

«Бұл жобалар толық жүзеге асырылған кезде Қазақстан арқылы транзитті 5 есеге арттыру мүмкіндігі туады», – деп атат өтті Н.Келбұғанов.