«Jibek joly» наурызда жолға шығады
«Қазақстан теміржолшысы» газетінің тілшісі
Былтырдан бері танымалдыққа ие болған «Jibek Joly» туристік пойызы наурызда жолға шығып, оның жолаушылары Наурыз мейрамын Қазақстан мен Өзбекстанда атап өту мүмкіндігіне ие болады.
Үшінші трансшекаралық тур 2025 жылдың 20-25 наурызы аралығына жоспарланған. Бұл жолы теміржол саяхатының бағдарына Тараз қаласы қосылды.
«Алматы – Түркістан – Ташкент – Самарқанд – Тараз – Алматы» бағытындағы халықаралық турдың ұзақтығы 5 күнді құрайды. Саяхатшылар ежелгі қалалардың ерекше атмосферасына еніп, Ұлы Жібек жолының ізімен саяхаттайды және екі елдің көрікті жерлерін аралайды.
Сонымен бірге туристер шығыстың қонақжайлылық атмосферасымен таныса алады. Тур бағдарламасы этноауылдағы мерекелік шараларды қамтиды, атап айтқанда концерттік бағдарлама, ұлттық салт-дәстүрлер және дәстүрлі тағамдардан дәм тату. Туристердің ыңғайлылығы үшін кәсіби гидтердің сүйемелдеуі, заманауи вагондарда жайлы тұру жағдайлары, тамақтану және экскурсиялар қарастырылған. Туристік пакеттерді туристік агенттіктерден сатып алуға болады.
Халықаралық турды ҚР Туризм және спорт министрлігінің қолдауымен «Жолаушылар тасымалы» АҚ, республикалық «Қазақстан туризм индустриясы» қауымдастығы және «Kazakh Tourism» ҰК» АҚ ұйымдастырды. Жобаның басты мақсаты – екі ел арасындағы туризмді дамыту, тарихи және мәдени мұралармен танысу арқылы халықтар арасындағы достықты нығайту.