ҚТЖ әкімшілік ғимаратта өрт-тактикалық оқу-жаттығу өткізеді
2025 жылғы 7 ақпанда ҚТЖ компаниясының әкімшілік ғимаратында төтенше жағдай кезінде персонал мен жедел қызметтердің іс-қимылдарын пысықтауға бағытталған ауқымды өрт-тактикалық оқу-жаттығу өтеді, деп хабарлайды Rail-news.kz.
Оқу-жаттығулар Қазақстан Республикасы Төтенше жағдайлар министрлігі (ҚР ТЖМ) Астана қаласы Төтенше жағдайлар департаментінің арнайы техникасы мен жеке құрамының қатысуымен өтеді.
Кешенді өрт-тактикалық оқу-жаттығу үш жылда бір рет өткізіледі.
Іс-шара аясында төтенше жағдай модельденіп, ғимарат қызметкерлерін эвакуациялау жүргізіледі. Оқу-жаттығудың басты мақсаты барлық қатысушылардың ықтимал қауіпсіздік қатерлеріне жедел ден қоюға дайындығын тексеру, сондай-ақ нақты қауіп төнген кезде жедел қызметтер мен ҚТЖ персоналы арасындағы іс-қимылдарды үйлестіруді жетілдіру болып табылады.
Оқу-жаттығу барысында ескерту, анықтау және дабыл беру, автоматты өрт сөндіру, түтін шығару және эвакуациялау жүйелерін қоса алғанда, барлық қауіпсіздік жүйелерінің жұмыс істеуін тексеруге ерекше назар аударылатын болады.
ҚТЖ әкімшілік ғимараты 2009 жылы салынған және елордадағы ең ірі ғимараттардың бірі болып табылады. Оның биіктігі 175,3 метр, ал ауданы 102 мың шаршы метрден асады. Ғимаратқа екі блок кіреді: 40 қабатты А блогы және 37 қабатты В блогы. Онда шамамен 3600 қызметкер жұмыс істейді.