ҚТЖ-ның әкімшілік ғимаратында ауқымды өрт-тактикалық оқу-жаттығу өтті (Фото)
ҚТЖ әкімшілік ғимаратында барлық қатысушылардың ықтимал қауіпсіздік қатерлеріне жедел ден қоюға дайындығын тексеру мақсатында үш жылда бір рет өткізілетін ауқымды өрт-тактикалық оқу-жаттығу өтті, деп хабарлайды Rail-news.kz.
Барлық тапсырмалар сәтті орындалды. Оқу-жаттығу барысында ғимараттың 3600 қызметкері жедел түрде эвакуацияланды. Шартты өртті сөндіруге 14 бірлік мамандандырылған техника, оның ішінде 10 негізгі және 4 қосалқы техника, сондай-ақ Қазақстан Республикасы Төтенше жағдайлар министрлігі (ҚР ТЖМ) Астана қаласы Төтенше жағдайлар департаментінің жеке құрамы қатысты.
Оқу-жаттығу барысында ғимараттың сыртында орнатылған көтергіштердің көмегімен адамдарды жоғарғы қабаттардан эвакуациялау әдістері пысықталды. Сонымен қатар, ғимараттың барлық қауіпсіздік жүйелері тексерілді. Атап айтқанда, хабарлау, анықтау және дабыл беру, автоматты өрт сөндіру, түтін шығару және эвакуациялау жүйелері өз жұмыстарын сәтті көрсетті.
Астана қаласы Төтенше жағдайлар департаментінің бастығы генерал-майор Марат Күлдіков оқу-жаттығу қорытындысы бойынша жоғары баға берді. Жоғарғы қабаттардан эвакуациялауға арналған көтергіш құрылғылар Астана қаласының биік ғимараттарында қолдану үшін ұсынылатыны атап өтілді.
