Қарағанды облысында теміржол үстімен өтетін жаяу жүргіншілер көпірі салынды
Қарағандыда Үлкен Михайловка тұрғындарының көпжылдық проблемасы шешілді. Мұнда қауіпсіз және ыңғайлы темір жол өткелі салынды, деп хабарлайды Rail-news.kz.
Бұған дейін ересектер мен балалар оқуға немесе жұмысқа, дүкенге немесе дәріханаға бару үшін күн сайын өмірін қауіпке тігіп, теміржолмен өтуге тура келетін.
Облыс әкімі Ермағанбет Бөлекпаев Қарағанды қаласында қауіпсіз және инклюзивті орта қалыптастыру үшін берілген тапсырмалардың орындалуын тексерді.
Алдымен ол Үлкен Михайловкадағы жаңа көпірді қарап қайтты. Оның ұзындығы шамамен 71 метр. Мүгедектігі бар адамдар мен баспалдақпен жүре алмайтын адамдар үшін лифтілер орнатылды. Жоба бойынша ашық өткел көзделген еді, бірақ түзетулер енгізіліп, шатыр жасалды. Өткен жылдың соңында нысан пайдалануға берілді және станса ауданында тұратын мыңға жуық адам оны пайдалануда.
Құрылыспен «Темір-Арқа» мердігерлік ұйымы айналысқан.
Кәсіпорын басшысы Марат Әбілқайыровтың айтуынша, құрылыс бірегей: көпірді екі тірек ұстап тұр. Магистраль жұмыс істеп тұрғандықтан, пойыздардың қозғалысы тоқтамағандықтан, құрылыс күрделі жағдайларда жүргізілді.
«Үлкен Михайловка тұрғындары темір жолдан өту мәселесін көтергеніне біраз болды. Бұл өте қауіпті учаске. Жаяу жүргіншілер көпірі жасалды. Осылайша біз адамдардың қауіпсіздігін қамтамасыз еттік», – деді Ермағанбет Бөлекпаев.
Ол тәртіпті қадағалау және қандай да бір нысанның бүлінуіне жол бермеу үшін бейнебақылау орнатуды тапсырды.