Пойызда мас жолаушы полицейлерге қарсылық танытты
Солтүстік Қазақстан облысы Булаев станциясындағы желілік полиция бөлімшесінің қызметкерлері «Есілкөл-Петропавл» бағытындағы электр пойызынан мас жолаушыны ұстап, түсіріп алды, деп хабарлайды Rail-news.kz.
Көлік полицейлері тексеру барысында 53 жастағы облыс тұрғынын анықтады. Масаң күйде болған ер адам, балағат сөздер айтып, жолаушылардың тыныштығын бұзған, сондай-ақ құқық қорғау органы қызметкерінің заңды талаптарына қарсылық танытқан.
Құқықбұзушыға қатысты алкогольдік ішімдіктер ішкені немесе қоғамдық орындарға масаң күйінде келгені, ұсақ бұзақылық жасағаны және құқық қорғау органы қызметкерінің заңды өкіміне немесе талабына бағынбағаны үшін 5 АЕК (19 660 теңге) мөлшерінде айыппұл салумен әкімшілік хаттама толтырылды.
Ұсақ бұзақылық пен бағынбау бойынша іс шешім қабылдау үшін сотқа жолданды. Естеріңізге сала кетейік, осы баптар бойынша құқық бұзушыға он бес тәулікке дейін әкімшілік қамауға алынуы мүмкін.
Анықтама үшін: жыл басынан бері Көліктегі ПД қызметкерлері түрлі әкімшілік құқық бұзушылықтар жасағаны үшін 10088 құқық бұзушыны әкімшілік жауапкершілікке тартты. Оның ішінде, белгіленбеген жерден темір жолды кесіп өткені үшін 5563, алкогольге қарсы заңнаманы бұзғаны үшін 725, қоғамдық орындарда мазасын алып тиіскені үшін 655, ұсақ бұзақылық жасағаны үшін 66, сондай-ақ темекі шегуге тыйым салуды бұзғаны үшін 316 тұлға.