Қазақстан мен Болгария Транскаспий дәлізі бойынша ынтымақтастықты дамытуда
Қазақстан Республикасының Болгариядағы Елшісі Виктор Темірбаев жаңадан тағайындалған Болгария Премьер-Министрінің орынбасары – Көлік және байланыс министрі Гроздан Караджовпен кездесті. Кездесу барысында Астана мен София арасындағы көлік-логистика саласындағы өзара іс-қимылды нығайту мәселелері талқыланды, деп хабарлайды Rail-news.kz.
Тараптар Еуропа, Орталық Азия елдері мен Қытай арасындағы көлік-транзиттік ағымдарды қамтамасыз етуде маңызды рөл атқаратын Транскаспий халықаралық көлік бағыты (ТХКБ) аясындағы әріптестікті арттыруға ерекше назар аударды. Қазақстандық дипломат ел үкіметінің ТХКБ бойындағы инфрақұрылымды жетілдіру бойынша қабылдап жатқан шаралары туралы айтты. Оның ішінде Ақтау портында контейнерлік хабтың және Құрық портында "Саржа" көпфункционалды теңіз терминалының құрылысы ерекше атап өтілді.
«Болгария, Қазақстан секілді, жаһандық сауда тізбегінде маңызды транзиттік рөлді атқарады және осы тұрғыда біз көлік-транзиттік саладағы ынтымақтастықты жандандыруымыз қажет», – деп атап өтті В.Темірбаев.
Кездесу барысында халықаралық автокөлік тасымалы саласындағы әріптестікті дамыту мәселелері де қарастырылды. Атап айтқанда, рұқсат бланкілері квотасын өзара ұлғайту мүмкіндіктері жөнінде пікір алмасу болды.
Өз кезегінде Гроздан Караджов Болгарияның Азия мен Еуропа арасындағы транзиттік тасымалдар үшін көлік-логистикалық хаб болуға әлеуеті бар екенін атап өтті. Ол сондай-ақ ТХКБ-ны дамытуға бағытталған ынтымақтастықты күшейтуге дайын екенін білдірді. Болгар министрі бұл шаралар екі ел арасындағы сауда көлемінің артуына ықпал ететінін де атап өтті.
Кездесу қорытындысы бойынша тараптар барлық өзекті мәселелер бойынша жұмыс байланыстарын қолдау туралы уағдаласты.