ҚТЖ Пәкістанның көлік-логистикалық компанияларымен ынтымақтастықты нығайтады
“KTZ Express” АҚ Бас директоры (“ҚТЖ” ҰК” АҚ еншілес компаниясы) Дәмір Қожахметов Пәкістан Ислам Республикасында болып, осы елдің ірі көліктік-логистикалық компаниялары басшылығымен, сондай-ақ Сауда министрлігі өкілдерімен бірқатар кездесулер өткізді, деп хабарлайды Rail-news.kz.
Келіссөздердің негізгі бағыты Оңтүстік Азия мен Таяу Шығыс елдері нарықтарына тауарлар экспорты үшін жаңа мүмкіндіктер ашатын Трансауған дәлізін дамыту болды.
Атап айтқанда, National Logistics Corporation (NLC) және Tranzum Courier Service (TCS) компанияларымен жүк тасымалын оңтайландыру және терминалдық пен порт инфрақұрылымын пайдалана отырып логистикалық шешімдерді дамыту бойынша ынтымақтастық мүмкіндіктері талқыланды. Пәкістан Сауда министрлігімен Пәкістан арқылы өтетін маршруттардың тиімділігі мен тартымдылығын арттыру үшін логистикалық процестерді жеңілдету және кедергілерді жою шаралары қарастырылды.
Порт аймағындағы көлік инфрақұрылымына ерекше назар аударылды - Карачи портының терминалдық қуаттары зерттелді, сондай-ақ “Солтүстік - Оңтүстік” маршрутында терминалдық қаңқаны құру тұжырымдамасы шеңберінде өңірде KTZ Express қатысуын кеңейту мәселелері бойынша порт терминалдарының иелерімен келіссөздер жүргізілді.