Тіл секторының жұмысы қорытындыланды

Компанияда мемлекеттік тіл саясатын іске асырумен айналысатын Мемлекеттік тілді дамыту секторы былтырғы жұмысын қортытындылады. Осы бағытта алға қойған мақсат-міндеттерді орындауға белсенді атсалысқан департаменттер мен жекелеген қызметкерлер Аппарат басшысы Серік Кеулімжаевтың Алғыс хаты мен бағалы сыйлықтарға ие болды.  

ҚТЖ-да мемлекеттік тіл саясаты бірнеше бағыттар бойынша іске асырылады. Оның ішінде ұлттық әдістемелік әдіснамамен қамтамасыз етуге, мемлекеттік тілді оқыту және оны қолдануға, құжат айналымындағы үлесін арттыруға назар аударылады.  

– Тоқсан сайын құжат айналымындағы мемлекеттік тілдің үлесіне талдау жасап, ескерту хат жіберіп отырамыз. Бұл біздің ғана емес, Үкіметтің қойып отырған талабы. Бәріміз бірігіп, сол талап бойынша компаниядағы қазақ тілінің қолданылу деңгейін 81 пайызға жеткізуіміз керек. Тағы бір бағытымыз – мемлекеттік тілді насихаттау. Ол үшін тілдің мәртебесін арттыру бойынша іс-шаралар өткізіледі. Құқықтық-әдістемелік қамтамасыз ету жағынан да көп жұмыстар атқарылуда. Біздің сектор қызметкерлерінің күшімен былтыр теміржол нысандарының атаулары жинағын әзірленді, сондай-ақ жұмыс барысында жиі қолданылатын сөздер мен сөз тіркестерінің жинағы шықты, – деді сектор басшысы Ербол Тоқтағазы.  

Оның айтуынша, өткен жылы аталған сектор өңірлердегі теміржол қызметкерлерін «Қазтест» бойынша сынақтан өткізген. Жалпы 3 502 адам осы сынақтан өткен. Соның ішінде теміржолшылардың 68 пайызы В1 және одан жоғары көрсеткіш көрсеткен, демек осынша адам қазақ тілінде оқи алады, сөйлейді, жаза біледі. Бірақ құжат айналымы әлі де төмен. 2023 жылы компанияда құжат айналымының 35 пайызы ғана қазақ тілінде болған. Былтыр мемлекеттік тілдің құжат айналымындағы үлесі 45 пайызға көтерілген. Ішкі құжаттар 34 пайызға ұлғайған.  

Жиын барысында «ҚТЖ-Жүк тасымалы» ЖШС мен Әскерилендірілген теміржол күзеті мекемелерінде мемлекеттік тілді дамыту жөніндегі 2024-2025 жылдарға арналған іс-шаралар жоспарының орындалуы жөніндегі есебі тыңдалды.  

– 2024 жылдың І жартыжылдығында серіктестіктің орталық аппаратынан 30 департамент және 13 филиал арасында мемлекеттік тілді дамытуға бағытталған бейнечеллендж ұйымдастырылды. Аталған акция бойынша қызметкерлер белсенді жұмыс атқарды. Бұл іс-шара қазақ тілін кеңінен насихаттауға септік етті. Серіктестіктің қазақ тіліндегі құжат айналымын 2024-2025 жылдарға арналған жоспарға сәйкес 80%-ға жеткізу мақсаты өте маңызды қадам. Осы мақсатқа жету үшін ай сайын кеңсе қызметкерімен тығыз жұмыс жасалуда. Нәтижесінде шығыс хаттардың үлесі өткен жылы 87% дейін көтерілді, – деді «ҚТЖ-Жүк тасымалы» ЖШС Адами ресурстарды басқару және әлеуметтік саясат департаментінің бас менеджері Мирамгүл Ахметова.

Отырыс соңында былтыр құжат айналымындағы мемлекеттік тілдің үлесін арттыруда үздік нәтиже көрсеткен бөлімшелер мен іс-шаралар өткізуде белсенділік танытқан қызметкерлер Алғыс хатпен марапатталды. Сектор басшысы барлық теміржолшыларды осы жоспарға сәйкес биыл да бірлесе қарқынды жұмыс істеуге шақырды.