Астанада өткен фестивальде теміржол мамандығы жастарды қызықтырды
Астанада жұмысшы мамандықтарды насихаттап, жастарды кәсіби білім алуға тартуға бағытталған «Жұмысшы мамандар қаласы» фестивалі өтіп жатыр. Теміржол саласының өкілдері де бұл шарада бой көрсетіп, қонақтарды машинист кабинасымен, пойыз қозғалысын онлайн бақылау жүйесімен және жолсерік жұмысының ерекшеліктерімен таныстырды, деп хабарлайды Rail-news.kz.
Қазіргі таңда теміржол саласында кадр даярлау белсенді жүріп жатыр. Мысалы, 2024 жылы 23 105 қызметкер оқудан өтіп, 50 961 маман біліктілігін арттырды. Дуальды білім беру жүйесі дамуда – 1 112 студент 22 кәсіпорында оқып, шамамен 2 000 студент кәсіби тәжірибеден өтті.
«Жазғы студенттік отрядтар» жобасы аясында 100-ден астам көлік колледждерінің студенттері маусымдық жұмысқа орналасты, оның ішінде 18 студент «Достық» және «Алматы» станцияларында жол жөндеуші болып еңбек етті.
«Жас Темір» бағдарламасы үздік түлектерге ақылы тағылымдамадан өту мүмкіндігін ұсынады, ал «Магистраль» бағдарламасы жыл сайын 70-ке жуық студентке білім гранттары мен атаулы шәкіртақылар тағайындайды.