Ардагерді құттықтады

Жамбыл локомотив пайдалану депосының директоры Айғабыл Утеубаев пен кәсіподақ комитетінің төрағасы Рымтай Жолдасбеков, депо ардагерлер кеңесінің төрағасы Айтан Өскенбаев бастаған топ қарт машинист Владимир Степанчукты 91 жасқа толған туған күнімен құттықтап барды. Әлі күнге дейін өзі тұрып-жүретін қария өмірлік серігі, әйелінің төсек тартып жатып қалғанына қынжылатыны болмаса, ешкімге зияным жоқ дейді. Әріптестерімен емін-жарқын әңгіме құрған қарт майдангер Владимир Иванович 1925 жылдың 15 ақпанында Қырғызстанның Фрунзе облысының Талас ауданында дүниеге келген екен. Соғысқа 1943 жылдың 18 мамырында шақырылып, 1944 жылы Ташкент қаласында сержанттар даярлайтын мектепті бітіріп шығады. Кейін Алматы қаласында жасақталған батальонда соғысқа аттанады. Владимир Степанчук Прибалтика, Литваны азат етуге қатысады. Бір ұрыста гранат сынығы аяғына тиіп, қатты жараланады. 1950 жылдың 3 сәуірінде әскер қатарынан босап, Қырымға келген соң Симферопол қаласындағы локомотив депосында паровоз машинисінің көмекшісі болады. Кейін жолдамамен Сары-Шаған депосына жұмысқа жіберілген жас машинист Жамбыл депосына ауысқан соң 1980 жылы зейнетке шыққанша тапжылмай еңбек етеді. «Ұлы Отан соғысының ІІ дәрежелі» ордені мен «Германияны жеңгені үшін» және «Ерлігі үшін» медальдарының иегері Владимир Степанчук қалын сұрай келген депо басшыларына алғысын айтып, ақ батасын берді.

Ерман ӘБДИЕВ, Тараз