Мемлекет басшысы Көлік министрін қабылдады
Марат Қарабаев Қасым-Жомарт Тоқаевқа министрліктің былтыр атқарған жұмысының қорытындысы туралы есеп беріп, алдағы кезеңге арналған жоспарын таныстырды, деп хабарлайды Rail-news.kz.
Министрдің айтуынша, көліктің барлық түрі бойынша тасымал көлемі 6% өскен. Транскаспий халықаралық көлік дәлізі арқылы өтетін жүк тасымалы 4,5 млн тоннаны құрады (өсім – 62%), оған қоса 12 мың шақырым жол жөнделді.
Қарағанды – Алматы, Талдықорған – Өскемен, Ақтөбе – Қандыағаш және Атырау – Астрахань тас жолдарын жаңғырту аяқталды.
Былтыр теміржол көлігімен 21 млн жолаушы тасымалданған (өсім – 3,9%). Биыл 125 теміржол бекетін жаңғырту жұмыстары қолға алынады, сондай-ақ 5 ірі инфрақұрылым жобасы жүзеге асырылып жатыр.
Президент өз кезегінде қазақстандықтардың жол жүруіне анағұрлым қолайлы жағдай жасау, туристік нысандарға қолжетімділікті қамтамасыз ету қажет екенін атап өтті.