«Jibek Joly» туристік пойызы KITF көрмесінде «Үздік туристік өнім» деп танылды

Алматы қаласында өтіп жатқан 23-ші Қазақстандық халықаралық туристік көрме – Kazakhstan International Tourism Fair (KITF) Орталық Азиядағы туризм және оған іргелес салалар бойынша ең ірі кәсіби алаң саналады. Көрме аясында Ұлттық тасымалдаушы – «Жолаушылар тасымалы» АҚ «Үздік туристік өнім» номинациясы бойынша марапатқа ие болды. Бұл құрмет ТМД аумағында алғаш рет жүзеге асырылған халықаралық туристік бағыт — «Jibek Joly» пойызының табысты іске асырылуының нәтижесі ретінде берілді, деп хабарлайды Rail-news.kz.

Бұл жоба Мемлекет басшысының туристік әлеуетті арттыру жөніндегі тапсырмасын орындау аясында жүзеге асырылып, теміржол туризмін дамытуға бағытталған стратегиялық бастамалар қатарына жатады.

«Jibek Joly» халықаралық туристік пойызы іске қосылған күннен бастап жолаушылардың ерекше қызығушылығына ие болды. Қазіргі уақытқа дейін «Алматы – Түркістан – Ташкент – Самарқанд – Тараз – Алматы» бағыты бойынша төрт рейс сәтті орындалып, шамамен 1000 турист осы мәдени-танымдық бағытпен саяхаттады.

Пойыз құрамына отандық өндірістен шыққан 5 вагон кіреді, оның төртеуі купелік, біреуі мейрамхана-вагон. Қызмет көрсету деңгейінің жоғарылығы мен жайлылығы бұл жобаны Қазақстан мен Өзбекстан арасындағы туризм және теміржол қатынасы саласындағы табысты әрі стратегиялық маңызды ынтымақтастықтың көрнекі үлгісіне айналдырады.

Ұлттық тасымалдаушы «Jibek Joly» пойызының келесі сапарын 30 сәуірде іске қосуды жоспарлап отыр. Сонымен қатар, жоба аясында жаңа халықаралық туристік бағыттарды кеңейту көзделуде.

Көрме барысында сондай-ақ ұлттық тасымалдаушының сенімді серіктестері мен туроператорлары туризмді дамытуға қосқан үлесі үшін түрлі номинациялар бойынша марапатталды. Атап айтқанда, үздік адалдық бағдарламасы, инновациялық туристік өнім, мәдени-танымдық турлар мен жоғары клиентке бағдарланған қызмет көрсету салаларында үздіктер анықталды.