«Нұрлы жол» вокзал кешенінде Жеңістің 80 жылдығына орай ағаш отырғызылды
Ұлы Отан соғысындағы Жеңістің 80 жылдығына орай «Нұрлы жол» вокзал кешенінің аумағында ағаш отырғызу акциясы өтті, деп хабарлайды Rail-news.kz.
Бұл шара – бейбітшіліктің, құрмет пен ұрпақтар сабақтастығының символына айналды.
Іс-шараға соғыс ардагерлері, «ҚТЖ» ҰК» АҚ басшылығы мен қызметкерлері, сондай-ақ оның филиалы – «Магистральдық желі дирекциясының» өкілдері қатысты. Қатысушылар бірлесіп ағаш отырғызып, соғыс қаһармандарына деген құрметтерін білдіріп, өткенді ұмытпай, болашақ ұрпаққа бейбітшілік пен патриоттық құндылықтарды жеткізудің маңыздылығын атап өтті.
Теміржолшылар бұл бастама – тек ардагерлерге құрмет көрсету ғана емес, сонымен қатар қоршаған ортаны жақсартуға қосылған үлес екенін айтты.
Сондай-ақ, «Нұрлы жол» вокзалында Халықаралық «ҚазАқпарат» ақпарат агенттігімен бірлесе отырып, Жеңістің 80 жылдығына арналған тарихи фотокөрме ұйымдастырылды. Онда қала тұрғындары мен қонақтары соғыс жылдарындағы сирек архивтік фотосуреттермен таныса алады.