Кәсібі оның қырағылық...

Жаңалықтар

25.08.2017, 18:38

Семей станциясына ұзын-сонар жүк құрамы келіп тоқтады. Аялдау уақыты шектеулі. Сондықтан «бес қаруын» сайлап күтіп тұрған вагон қараушылар бірден іске кірісті. Қолындағы балғасымен вагон доңғалақтарын тық-тық ұрып адымдап бара жатқан жан Семей вагон пайдалану депосының «қыранкөзі» атанған вагон қараушысы Қазез Тұрыспеков. Қазез Мұхамадиұлының вагон қараушының балғасын қолына ұстағалы жиырма жыл өтіпті. 1995 жылы депоға вагон қараушысы болып жұмысқа орналасқаннан бері табан аудармастан еңбек етіп келеді. Сол тоқсаныншы жылдардағы күнкөрістің қамымен «балапан басына, тұрымтай тұсына» дегендей, елдегі халық жаппай қалаға ұмтылған қиын-қыстау кезең оның тағдырын темір жолмен байланыстырды. Уақытпен санаспай, тәуліктік кезекшілікпен атқарылатын, өзіндік ауыртпашылығы мен қиындығы және жауапкершілігі де мол вагон қараушысы кәсібін бір күнде немесе бір айда меңгеріп кеттім десе шындыққа жанаспас, жылдап тәжірибе жинағаны рас. Әлі есінде, алғаш рет 1998 жылы жүк вагонының дөңгелегінен жарықшық тапқанда, өзінің шын мәнінде, вагон қараушы мамандығын меңгергеніне сенім пайда болып еді. Сол жолғы қырағылығы үшін станция басшылығы оны Алғыс хатпен марапаттап, ақшалай сыйақы да алған. Ақаудың салмағы ауыр болып, вагон қараушының бұл қырағылығы ерлікке бағаланды. Мерейі өскен вагоншы жігіттің өз кәсібіне деген құрметі мен жауапкершілігі арта түскен. Содан бері де он бес жылдан аса уақыт өтіпті. Бүгінде тәжірибесі толысқан вагон қараушы Қазез Тұрысбеков бұдан кейін де сан мәрте қырағылық танытып, вагон доңғалақтарының талай қауіпті кінәраттарын анықтап, талай апаттың алдын алуға қызмет еткені анық. Мәселен, 2001 жылы бір айдың ішінде екі мәрте дөңгелек жарықшағын тауып, «қыранкөз» атанғаны да сол жолы. – Біздің жұмыс жоғары жауапкершілікті талап етеді. Темір жол бойында тосын оқиға орын алмауы үшін қырық градус суықта да, ыстықта да сергек жүріп, зейініңді сала еңбек етуің керек. Сонда ғана жұмысың нәтижелі болмақ, – дегенді қырағы вагон қараушы бүгінде тәрбиелеп жатқан шәкірттеріне қайталап айтудан еш жалыққан емес. Қазез Мұхамадиұлы еңбек ететін ұжымда жас мамандар көп. Қызмет барысында кеңес сұрайтын жаңа буынға айтары мол жанның араларында жүргеніне олар да разы. Жұмысқа жаңадан келген вагон қараушылары мұқияттылық пен құнттылықты Қазекеңдей ағаларынан үйренеді. Жаңадан қабылданған жігіттер жүріп өткен вагон бойын қайта тексеріп, кінәрат тауып алса, жанына шақырып алып, мән-жайды ерінбей-жалықпай қайта түсіндіруден жалыққан емес. «...міне, көрдің бе, мынау көзге көрінер-көрінбес сызықты мұқият қара, ол «тығылып» қалған ақау ма, әлде жай қауіпсіз белгі ме, доңғалақты соққанда дыбысынан ажыратып үйрен» деп, мән-жайды тәптіштей түсіндірген ұстаздың әр сөзі жастарға сабақ. Вагон пайдалану депосының директоры Асет Сүлейменов ұжымының мақтанышына айналған тәжірибелі вагоншы туралы жылы пікірін білдірді. – Қазекеңе әсіресе жас буын көп қарыздар. Ұзақ жыл еңбек өтілі бар адамның кәсіби біліктілігі де жоғары болмақ, өмірден көрген-түйгені мол жанның үйретері де көп болатыны белгілі ғой, және онысын үйретуден жалыққан емес, – дейді Асет Калибекұлы.

Қуаныш ҚОЖАЕВ,

Семей

Кәсібі оның қырағылық...

Басқа да жаңалықтар