Алтынкөл станциясының өткізу қабілетін арттыру шараларын талқылады
"ҚТЖ" ҰК" АҚ-ның Алматы бөлімшесінде ҚХР шекарасындағы маңызды логистикалық торап — Алтынкөл станциясының инфрақұрылымын дамыту мәселелері бойынша жұмыс кеңесі өтті, деп хабарлайды Rail-news.kz.
Станция арқылы Иран мен Парсы шығанағы, Еуропа және Орталық Азия елдері бағытында айтарлықтай жүк ағыны өтеді.
Кеңеске жобалау институтының өкілдері, сала ардагері Қалтай Самбетов және теміржолшылар қатысты. Талқылау барысында сарапшылар станцияны дамытудың алдын ала жобасын қарап, бірқатар ұсыныстар мен түзетулер енгізді.
Жобаға сәйкес Алтынкөл станциясында алты жаңа сұрыптау жолы мен қуаты аз дөңес салу жоспарлануда. Сондай – ақ іргелес учаскелерді дамыту бойынша жұмыстар жүргізілуде: Жетіген-Алтынкөл учаскесінде қосымша жолдар салу, сондай-ақ Жетіген мен Құрөзек разъезі арасында екі жолды қозғалысты ұйымдастыру көзделген.
Алматы жүк тасымалдау бөлімшесі директорының бірінші орынбасары Нұржан Құрманалиұлының айтуынша, жобаны іске асыру станция мен аралықтардың өткізу және өңдеу қабілетін екі есеге — тәулігіне 18-ден 33 жұп пойызға дейін арттыруға мүмкіндік береді. Бұл теміржол желісінің экспорттық, импорттық және транзиттік әлеуетін айтарлықтай арттырады.
2025 жылғы бес айдағы қорытынды бойынша Алтынкөл станциясы арқылы 6,5 млн тонна жүк тасымалданды — бұл өткен жылдың сәйкес кезеңімен салыстырғанда 22% артық.