«ҚТЖ» мен «Қытай темір жолдары» тасымал және инфрақұрылым жайын талқылады
Бейжіңде «Қазақстан темір жолы» ҰК» АҚ Басқарма төрағасы Талғат Алдыбергенов пен «Қытай темір жолдары» мемлекеттік корпорациясының бас директорының орынбасары Ван Лисиньнің кездесті, деп хабарлайды Rail-news.kz.
Келіссөз барысында тараптар тасымал көлемін ұлғайту, Транскаспий халықаралық көлік бағытын (ТХКБ) дамыту, CRCT компаниясының МСМ бірлескен кәсіпорнына кіруі және инфрақұрылымды дамыту мәселелерін талқылады.
Инфрақұрылымдық жобаларды іске асыруды аяқтау 2026 жылға қарай Достық — Алашанькоу түйісінде пойыздарды қабылдау мен өткізу көлемін арттыруға мүмкіндік беретіні атап өтілді. Бұл ретте қытай тарапы инфрақұрылым дамуын синхрондау үшін барлық күш-жігерін салатынын жеткізді.
2026 жылға арналған тасымал жоспарларын, көлемдері мен жүк номенклатурасын Алматы қаласында 22–26 қыркүйекте өтетін бірлескен комиссияда қарау туралы шешім қабылданды.
Сондай-ақ Бақты — Аягөз үшінші теміржол өткелін салу жобасын іске асыру мәселесі талқыланды. Оның пайдалануға берілуі 2028 жылдың басына жоспарланған. Тараптар биылғы жылдың соңына дейін жүк номенклатурасы мен терминалдардың мамандануын айқындаудың маңыздылығын атап өтті.