Quiz ойыны руханиятқа арналды
«Қазақстан теміржолшысы» газетінің тілшісі
Қазақстан халқының тілдері күні мен ұлт ұстазы Ахмет Байтұрсынұлының туған күніне орай ҚТЖ-да Мемлекеттік тілді дамыту секторының ұйымдастыруымен Quiz зияткерлік ойыны өтті. Мемлекеттік тілдің мәртебесін көтеруге арналған ойын тақырыбы «Ұлтымыздың ұлы ұстазы – А.Байтұрсынұлы» деп аталып, оған 4 адамнан құралған 8 топ қатысты.
ҚТЖ бас ғимаратында өткен іс-шараға теміржолшылар белсенді атсалысты. Зияткерлік ойыны 4 кезеңге бөлінді. Кіріспе кезеңінде қатысушылар 4 жауап нұсқасы бар сұрақтарға жауап берді. «Сөзжұмбақ» және «Байланыс» кезеңдерінде команда мүшелері кеңесе отырып, барлық сұрақтың ортақ жауабын табуға тырысты. «Тәуекел» деп аталатын төртінші кезеңде логикалық мәтін түріндегі сұрақтар қойылды. Барлық сауалдар қазақ руханияты мен негізінен Ахмет Байтұрсынұлының өмірі мен шығармашылығына арналды.
Ойын нәтижесінде мемлекеттік тіл саясатын насихаттау, мемлекеттік тілдің мәртебесі мен беделін көтеруге атсалысып, жоғары ұпай жинаған «ЦЮ-Орда» тобы 1-орынды иеленді. Екінші орынды «Маса» және «Қазына» топтары өзара бөлісті. Ал үшінші орын «Ана тілі», «Сақтар» және «Қамажай» командаларына берілді. Ал жүлдегерлер қатарынан табылмаған «Кербез», «Көшпенділер» командаларына ынталандыру сыйлықтары берілді.
– Ойын өте қызықты, тартысты өтті. Сұрақтар тек тіл маманы үшін ғана емес, жалпы барлық саладағы адамдар үшін оңай, бастысы бұл жерде логиканы іске қосып, бұрын тарих пен әдебиеттен өткен деректерді еске түсіру керек. Біздің топ заңгерлерден құралғандықтан бұл аса қиын болмады. Жалпы мұндай жарыстарға жиі қатысамыз, мақсатымыз – мемлекеттік тілдің мәртебесін арттыру, қазақ тілінің қолданыс аясын кеңейтуге атсалысу, – дейді жеңімпаз команда «ЦЮ-Орда» тобының мүшесі, компанияның құқықтық қамтамасыз ету департаментінің менеджері Диас Шарафадин.
Сайысқа түскен 32 адам сыйлықсыз қалмады. Ынталандыру сыйлығына ет астауы, үшінші орынға музыкалық киіз үй, екінші орынға қысқатолқынды пеш және бірінші орын алғандарға мультиварка тарту етілді. Мемлекеттік тілді дамыту секторының басшысы Ербол Тоқтағазы мұндай іс-шаралар алдағы уақытта да жалғасып, ана тіліміздің қолданыс аясын кеңейту бағытында жоспарлы жұмыстар жүргізіле беретінін жеткізді.