Жамбылда жұмыс жүйелі жүруде

Жаңалықтар

18.07.2016, 12:41

Жамбыл жол бөлімшесіне қарасты Жамбыл станциясы өңірдегі ірі станцияның бірі. Станцияда 187 адам еңбек етеді. Сыныптан тыс станцияда күнделікті пойыздар қабылданып, жөнелтіліп отырады. Жұмыс ауқымды. Өйткені, станцияда жүк пойыздарымен қатар жолаушылар пойыздарына да қызмет көрсетіледі. Станцияда бес парк бар. Транзиттік паркте жолаушылар пойызы қабылданса, сұрыптау паркінде сегіз жол бар. Тәулігіне 18-19 пойыз жасақталатын станцияда 1200-1300 вагон сұрыптау дөңесінің «сүзгісінен» өтеді. Сондай-ақ, үш бағытта – Түлкібас, Шу, Қаратау – Жаңатас бағытына пойыздар жөнелтіп отыратын теміржолшылар жұмыс сапасына көңіл бөлген. Ал станция қызметкерлері әр аптаның дүйсенбісінде өтетін «Станция бастығының күнінде» жұмыс барысын пысықтап, өндірістік өнімділікті арттыруда етене жұмыс жасап отырған темір жол мекемелері өкілдерімен алдағы шараларды талқылайды. Дүйсенбі күні өткен шарада өткендегі «Станция бастығы күнінде» талқыланған мәселелердің орындалуы мен тапсырмалар қаралды. Және пойыздар қозғалысы қауіпсіздігін еңсерудегі өзге қызмет өкілдері мен станция қызметкерлерінің есебі тыңдалды. Болат жолдың жағдайы, сигнал беру және байланыс құрылғыларының дұрыс жұмыс істеуі, станция қызметкерлерінің технологиялық процестерді орындауы, пойыздар құрамын жасақтаудағы ережелердің сақталуы, пойыздар кестесінің орындалуы, қоршаған ортаны қорғау және еңбек қауіпсіздігі, техникалық оқу шаралары сынды мәселелер сөз болды. –Дүйсенбіде өткен Станция бастығының күнінде Ірілендірілген Жамбыл жол дистанциясының қызметкерлеріне «Терезе» беруде бақылауды күшейту тапсырылды. Ал «ЖамбылРемСервис» ЖШС өкілдеріне жөндеуден өткен вагондарды уақытылы тапсыру міндеттелді. Жамбыл локомотив пайдалану депосының қызметкерлеріне 21,22 жол бойын құмнан, өзге де қалдықтардан тазарту, Әскерилендірілген темір жол күзетінің сарбаздарына станция аумағындағы өткелдерден жаяу өткіншілердің қауіпсіз өту ережелерін назарда ұстауы тапсырылды. Сондай-ақ, қазір қала аумағында өтіп жатқан тазалық екі айлығына қатысу мақсатында сенбі сайын сенбіліктерге шығу тапсырылды. Станция бастығының күнінде берілген тапсырмалардың орындалуы тұрақты қадағаланып отырады, – дейді станцияны алты жыл басқарып отырған Талғат Тобышақов. Станция ұжымы биыл жыл басынан бері пойыздардың қозғалыс қауіпсіздігін жоғары деңгейде қамтамасыз етіп келеді. Теміржолшылар қауіпті аймақтарға қауіпсіздікті сақтау, темір жол бойында сақтық шараларын қолдануды ескерткен арнайы билбордтар, аншлаг іліп, станция аумағына жақын орналасқан тұрғындарға жадынамалар таратып отыр. Жамбыл вокзалына да арнайы аншлагтар ілінген. Жамбыл станциясының қауіпсіздік жөніндегі инженері Мұхтар Кирбаевтың айтуынша, станцияда жұмыс істеп жүрген жастардың өнертапқыштық ізденістері артып келеді екен. Олардың рационализаторлық ұсыныстары қаралымда жатқан көрінеді. «Жақында станция аумағында жолдың барлық мезгілінде және түнгі уақытта вагондардың тіркеу нөмірін анық көретін құрал ойлап тауып, арнайы ұсыныс жасадық. Қазір ол қаралымда. Егер бұл ұсынысымыз мақұлданып жатса, көп көмек болар еді» дейді инженер. Станция қызметкерлері биылғы көктемгі комиссиялық байқауда да жақсы көрсеткіштерге қол жеткізуде. Ал 15 сәуір мен 15 мамыр айлары аралығында жарияланған «Жөнелтілетін жүктердің сақталуын қамтамасыз ету» айлығын жоғары деңгейде ұйымдастыруда станция басшылығы жоспарлы іс-шараларын бастап та кеткен.

Жамбылда жұмыс жүйелі жүруде

Басқа да жаңалықтар

«Қазақстан теміржолшысы» газеті, №42 17 мамыр 2024 жыл