Олжас Бектенов «Алматы айналма теміржолы» және «Достық – Мойынты» учаскесі бойынша тапсырмалар берді
Үкімет отырысында Олжас Бектенов Қазақстанның транзиттік мүмкіндіктерін одан әрі арттыру үшін айтарлықтай әлеует бар екенін атап өтті, деп хабарлайды Rail-news.kz.
Премьер-министр Көлік министрлігіне салалық ұлттық компаниялармен бірлесіп, негізгі инфрақұрылымдық жобалардың уақтылы әрі сапалы жүзеге асырылуын қамтамасыз етуді тапсырды. Бұл еліміздің көлік жүйесін дамытуда стратегиялық маңызға ие.
«Автожол желілерінде және «Алматы айналма теміржол» жобасында құрылыс жұмыстарын уақтылы аяқтау қажет. Сондай-ақ «Достық – Мойынты» учаскесінде экспорттық және транзиттік тасымалдарды ұлғайту мәселесіне баса мән беру керек. Бұған қоса, шетелдік рұқсат бланкілерін электронды форматқа көшіру бойынша жұмыстарды жалғастыру қажет», — деп атап өтті Олжас Бектенов.
Бұл шаралар тасымалдау көлемін ұлғайтуға және көлік желісі сапасын арттыруға мүмкіндік береді.