Туризмді дамыту сөз болды
«Қазақстан теміржолшысы» газетінің тілшісі
Осы аптадағы Үкімет отырысында Көлік министрі Нұрлан Сауранбаев туризмді дамытуда көлік саласы маңызды рөл атқаратынын айтты.
Көлік саласы өңірлердегі туристік дестинациялардың қолжетімділігін арттырып, туристердің еркін қозғалуына мүмкіндік береді деп санайды министр.
– Теміржол саласында жолаушылар вагондары паркін жүйелі жаңарту жүргізілуде. 2025 жылы 175 жаңа вагон сатып алынды. Биыл 191 вагон алу жоспарлануда. Жалпы 2030 жылға дейін шамамен 800 вагон жаңартылады, 2026 жылы – 191, 2027 жылы – 104, 2028 жылы – 105, 2029 жылы – 104, 2030 жылы 102 вагон алынады. Бұл вагон паркін 90 пайызға жаңартуға мүмкіндік береді, – деді министр.
Сонымен қатар ол 2026 жылдың жазғы маусымында халықтың сұранысына сәйкес 13 қосымша бағдар ұйымдастырылып, шамамен 400 мың қосымша орын ұсынылатынын жеткізді.
– Алакөл бағытына ерекше көңіл бөлінеді. Бұл бағытта 8 қосымша пойыз (12-18 вагон) болады. Жалпы Астанадан аптасына 2 рет, Алматыдан күнара 2 пойыз, Семей және Өскеменнен күнара 1 пойыз қатынайды, сонымен қатар Алматы – Достық, Қызылорда – Достық және Павлодар – Достық қосымша тіркелмелі вагондар бар. Сонымен қатар туристік дестинацияларда орналасқан 19 теміржол вокзалына жөндеу және жаңғырту жұмыстары жүргізілуде, – деді Нұрлан Сауранбаев.